काठमाडौं । नेपाल अटोमोबाइल इम्पोर्टर्स एण्ड म्यानुफ्याक्चरर्स एसोसिएसन (नाइमा)को आयोजनामा नाइमा मोबिलिटी एक्स्पो २०८३ आजदेखि काठमाडौंमा सुरु हुँदैछ। एक्स्पो साउन २६ देखि ३१ गतेसम्म सञ्चालन हुनेछ।

नाइमाका अनुसार यस वर्षको एक्स्पो गत वर्षको तुलनामा थप भव्य र विस्तृत हुनेछ। प्रदर्शनीमा ५५ भन्दा बढी ब्रान्ड सहभागी हुँदैछन् भने ५१ वटा स्टल रहनेछन्। एक्स्पोमा ४० भन्दा बढी नयाँ उत्पादन सार्वजनिक तथा लन्च गरिने आयोजकले जनाएको छ।

एक्स्पोमा दुईपाङ्ग्रे तथा चारपाङ्ग्रे सवारीसाधनसँगै व्यावसायिक सवारी, विद्युतीय तथा हाइब्रिड मोबिलिटी समाधान, अटोमोबाइल प्रविधि, सेवा र मोबिलिटीसँग सम्बन्धित विभिन्न उत्पादन प्रदर्शनीमा राखिनेछन्।

कुन–कुन ब्रान्ड सहभागी हुँदैछन्?

नाइमा मोबिलिटी एक्स्पोमा दुईपाङ्ग्रे सवारीतर्फ बजाज, होन्डा, टीभीएस, केटीएम, रोयल इन्फिल्ड, एथर, सुजुकी, याडिया, निउ, प्यूज, बगाउस, अल्ट्राभ्वाइलेट, केरेन, गारो, सीएफमोटो, ट्रायम्फ र जेएक्स मोटोसाइकल्सलगायतका ब्रान्ड सहभागी हुनेछन्।

एक्स्पोमा नयाँ प्रविधि, विद्युतीय सवारीसाधन र पछिल्लो पुस्ताका मोबिलिटी समाधानलाई विशेष प्राथमिकता दिइने आयोजकले जनाएको छ।

Originally published on abcnews.com.np.