काठमाडौं । नेपाल ट्रक यातायात व्यवसायी महासंघ र सानिमा बैंकबीच नागढुंगा–सिस्नेखोला सुरुङमार्गको प्रवेश तथा उपभोग शुल्क नगदरहित प्रणालीबाट भुक्तानी गर्ने सम्झौता भएको छ। सम्झौताअनुसार शुल्क आरएफआईडी प्रणालीमार्फत व्यवस्थापन गरिनेछ भने क्यूआर कोडबाट पनि भुक्तानी गर्न सकिनेछ।

यस व्यवस्थाले नियमित रूपमा सुरुङमार्ग प्रयोग गर्ने ट्रक तथा मालवाहक सवारी व्यवसायीलाई नगद बोक्नुपर्ने बाध्यता हटाउनुका साथै शुल्क भुक्तानीलाई सहज र पारदर्शी बनाउने अपेक्षा गरिएको छ।

सरकारले सुरुङमार्ग प्रयोग गर्ने सवारीसाधनका लागि फरक–फरक शुल्क निर्धारण गरेको छ। कार, भ्यान, पिकअपलगायत हलुका सवारीसाधनले काठमाडौं प्रवेश गर्दा ६५ र बाहिरिँदा ६० रुपैयाँ तिर्नुपर्नेछ। बस तथा सिंगल रियर एक्सलका ट्रकका लागि प्रवेश शुल्क २६० र बाहिरिने शुल्क २०० रुपैयाँ तोकिएको छ। मल्टी एक्सल ट्रक तथा भारी सवारीसाधनका लागि प्रवेश शुल्क ६०० र बाहिरिने शुल्क २५० रुपैयाँ निर्धारण गरिएको छ।

Originally published on abcnews.com.np.