काठमाडौं । मेटलाइफ नेपालले पोखरा महानगरपालिका–९, न्युरोडस्थित अव्यक्त कम्प्लेक्समा गण्डकी प्रदेश कार्यालय सञ्चालनमा ल्याएको छ।

कम्पनीका अनुसार नयाँ कार्यालयमार्फत गण्डकी प्रदेशका ग्राहक, बीमा अभिकर्ता तथा व्यावसायिक साझेदारलाई छिटो, सहज र गुणस्तरीय सेवा उपलब्ध गराउने लक्ष्य राखिएको छ।

कार्यालय उद्घाटन कार्यक्रममा नेपाल बीमा प्राधिकरण, गण्डकी प्रदेश कार्यालयका प्रमुख शम्भु प्रसाद मिश्र तथा मेटलाइफ नेपालका वरिष्ठ पदाधिकारीको उपस्थिति थियो।

नयाँ कार्यालयबाट बीमा परामर्श, पोलिसी सेवा, दाबीसम्बन्धी सहजीकरण तथा ग्राहक सेवासहितका सुविधा प्रदेशमै उपलब्ध हुने कम्पनीले जनाएको छ। साथै, बीमा अभिकर्ता तथा व्यावसायिक साझेदारलाई आवश्यक सहयोग उपलब्ध गराउने बताइएको छ।

स्थानीय सेवामा सहजता ल्याउने अपेक्षा

मेटलाइफ नेपालका महाप्रबन्धक निर्मल काजी श्रेष्ठले गण्डकी प्रदेशमा कार्यालय स्थापना गर्नु कम्पनीको दीर्घकालीन प्रतिबद्धताको हिस्सा भएको बताए।

उनले बीमा सेवा सबैका लागि सहज र पहुँचयोग्य बनाउनुपर्ने भन्दै नयाँ कार्यालयमार्फत ग्राहकसँगको सम्बन्ध थप नजिक हुने विश्वास व्यक्त गरे।

कार्यालय सञ्चालनमा आएपछि स्थानीय समुदायसँगको सहकार्य विस्तार हुनुका साथै बीमा अभिकर्ताको व्यावसायिक क्षमता अभिवृद्धिमा सहयोग पुग्ने कम्पनीको अपेक्षा छ।

त्यस्तै, प्रदेशभरका व्यावसायिक संस्था तथा विभिन्न निकायसँग सहकार्य विस्तार गर्दै व्यक्ति, परिवार र व्यवसायलाई बीमा तथा आर्थिक सुरक्षाका सेवा थप सहज बनाउने कम्पनीले जनाएको छ।

Originally published on abcnews.com.np.