काठमाडौं । सभामुख डीपी अर्यालले व्यावसायिक तथा पेशागत संस्थालाई राजनीतिक विवाद र स्वार्थबाट टाढा राख्नुपर्ने बताएका छन्।

नेपाल एशोसिएसन अफ टुर एण्ड ट्राभल एजेन्ट्स (नाट्टा)को ५९औँ साधारणसभाको उद्घाटन समारोहमा बोल्दै अर्यालले नाट्टा व्यावसायिक संस्था भएकाले पर्यटन क्षेत्रको विकास, व्यवसाय प्रवर्धन र व्यावसायिक हितमा केन्द्रित हुनुपर्ने बताए।

“यो व्यावसायिक संस्था हो, यसमा राजनीति नगरौँ। पर्यटन क्षेत्रको विकास, व्यवसायको प्रवर्धन र व्यावसायिक हितका विषयमा केन्द्रित भएर अघि बढौँ,” उनले भने।

पर्यटनका लागि सुरक्षा सबैभन्दा महत्वपूर्ण विषय भएको उल्लेख गर्दै अर्यालले हवाईजहाज, ट्याक्सी, होटललगायत पर्यटनसँग जोडिएका हरेक सेवामा पर्यटकले सुरक्षित महसुस गर्ने वातावरण बनाउनुपर्ने बताए। पर्यटन क्षेत्र सुधारका लागि व्यवसायी, सरकार र सम्बन्धित सबै पक्षबीच सहकार्य आवश्यक रहेको उनको भनाइ छ।

अर्यालले काठमाडौं उपत्यकामा व्यवस्थित पर्यटक बसपार्क निर्माण गर्नुपर्नेमा जोड दिए। अहिले सञ्चालनमा रहेका बसपार्क तथा उपलब्ध संरचनालाई प्रभावकारी रूपमा प्रयोग गर्दै पर्यटक बसपार्कका लागि निश्चित क्षेत्र तोक्नुपर्ने उनले बताए।

नेपाल वायुसेवा निगमलाई प्रभावकारी र प्रतिस्पर्धी बनाउन संरचनागत सुधार आवश्यक रहेको पनि अर्यालले बताए। “नेपाल एयरलाइन्स बन्छ, तर अहिलेकै संरचनाले बन्दैन,” उनले भने।

विश्वका विभिन्न एयरलाइन्स नेपालसँग सहकार्य गर्न इच्छुक रहेको उल्लेख गर्दै उनले व्यक्तिगत लाभभन्दा माथि उठेर राष्ट्रिय हित र पर्यटन क्षेत्रको विकासलाई प्राथमिकता दिनुपर्ने बताए।

नेपालको पर्यटन विकासका लागि नेपाललाई युरोपेली संघको एयर सेफ्टी लिस्टबाट यथाशीघ्र हटाउनुपर्नेमा उनले जोड दिए। त्यसका लागि पर्यटन व्यवसायीको समेत सक्रिय भूमिका आवश्यक रहेको उनले बताए।

पर्यटन व्यवसायमा नेपाली र विदेशी पर्यटकबीच हुने विभेद अन्त्य गर्नुपर्ने पनि अर्यालले बताए। “होटलमा नेपाली पर्यटक आएर बसिदिऊन्, धेरै खर्च गरून् भन्ने चाहना राख्ने तर व्यवहारमा विभेद गर्ने प्रवृत्ति अन्त्य गर्नुपर्छ,” उनले भने।

पछिल्लो निर्वाचनमा जनताले ठूलो मतसहित सरकारलाई स्पष्ट जिम्मेवारी दिएको उल्लेख गर्दै अर्यालले अब सरकार असफल हुने छुट नरहेको बताए।

“मुलुक समृद्ध हुनैपर्छ। सुशासन कायम गर्दै भ्रष्टाचारलाई जरैदेखि उखेल्नुपर्छ,” उनले भने।

Originally published on abcnews.com.np.