काठमाडौँ । नेपाली कांग्रेसका नेता डा. शेखर कोइरालाले दलभित्र वा बाहिर कुनै पनि प्रकारको निरंकुशता स्वीकार गर्न नसकिने बताएका छन्।

शुक्रबार काठमाडौँको सुकेधारामा आयोजित राष्ट्रिय भेलालाई सम्बोधन गर्दै कोइरालाले कांग्रेस लोकतन्त्र र स्वतन्त्रताको पक्षमा उभिने पार्टी भएकाले निरंकुशता स्वीकार गर्न नसक्ने स्पष्ट पारे।

‘हामी कुनै किसिमको निरंकुशता स्वीकार गर्दैनौं। कांग्रेस कुनै निरंकुशता नस्वीकार्ने पार्टी हो,’ उनले भने।

कोइरालाले अहिले लोकतन्त्र कठिन परिस्थितिबाट गुज्रिरहेको बताए। ‘प्रजातन्त्र भनौं वा लोकतन्त्र, अहिले अप्ठ्यारो परिस्थितिमा छ,’ उनले भने।

सरकारका कारण प्रेस स्वतन्त्रता, न्यायपालिका र मानव अधिकारको अवस्था समेत चुनौतीपूर्ण बन्दै गएको उनको आरोप थियो। प्रेस स्वतन्त्रतामाथि ‘अँध्यारो बादल’ मडारिन थालेको भन्दै त्यसलाई कांग्रेसले मात्रै चिर्न सक्ने उनले दाबी गरे।

मानव अधिकार उल्लंघन भइरहेको आरोप लगाउँदै कोइरालाले सरकारी आदेशका नाममा नागरिकका घरमा प्रहरी प्रशासन पुगेर खानतलासी गर्ने कार्य स्वीकार्य नहुने बताए।

‘मानव अधिकार अत्यन्त नाजुक अवस्थामा गइरहेको छ। माथिको आदेश भन्दै मानिसको घरमा गएर प्रहरी प्रशासनले खानतलासी गरिरहेको छ। यो अवस्था स्वीकार गर्न मिल्दैन,’ उनले भने।

उनले न्यायपालिका स्वतन्त्र र निष्पक्ष हुनुपर्नेमा जोड दिँदै सर्वोच्च अदालतबाट न्याय पाउने विश्वास व्यक्त गरे। विगतमा न्यायका लागि गरिएको प्रयास सफल हुन नसकेको उल्लेख गर्दै उनले अब न्यायपालिकाको निर्णयका आधारमा अघि बढ्ने बताए।

‘हामीले प्रयास पनि गरेका हौं। त्यो विफल भयो,’ उनले भने, ‘सर्वोच्चले न्याय दिन्छ, त्यही न्यायबाट हामी अगाडि बढ्छौं।’

कोइरालाले नेपाली कांग्रेसभित्र अहिले विभाजनको मनस्थिति देखिए पनि पार्टी अन्ततः एकढिक्का हुने विश्वास व्यक्त गरे।

‘नेपाली कांग्रेस विभाजित मनस्थितिबाट गुज्रिरहेको छ,’ उनले भने, ‘तर एकढिक्का हुन्छ भन्ने कुरामा म विश्वस्त छु।’

Originally published on abcnews.com.np.