काठमाडौं । भारतको सर्वोच्च अदालतले ‘इन्डियाज गट लेटेन्ट’ कार्यक्रममा अपांगता भएका व्यक्तिमाथि असंवेदनशील टिप्पणी गरेको आरोपमा कमेडियन समय रैनासहित पाँच जनाविरुद्ध दर्ता भएका आपराधिक मुद्दा खारेज गरेको छ।

प्रधानन्यायाधीश सूर्यकान्त तथा न्यायाधीश जयमाल्या बागची र भी मोहना सम्मिलित इजलासले शुक्रबार यस्तो आदेश दिएको भारतीय सञ्चारमाध्यमले जनाएका छन्। मुद्दाबाट राहत पाउने अन्यमा विपुल गोयल, बलराज परमजीत सिंह घई, सोनाली ठक्कर उर्फ सोनाली आदित्य देसाई र निशान्त जगदीश तंवर छन्।

सर्वोच्चले उनीहरूविरुद्ध दर्ता भएका प्राथमिकी (एफआईआर) खारेज गर्दै अपांगता भएका व्यक्तिको हितमा कार्यक्रम आयोजना गरी सहयोग जुटाउने उनीहरूको प्रयासको समेत प्रशंसा गरेको छ।

विवाद कसरी सुरु भयो?

विवादित ‘इन्डियाज गट लेटेन्ट’ कार्यक्रमको उक्त भाग १४ नोभेम्बर २०२४ मा मुम्बईको खार ह्याबिट्याटमा छायांकन गरिएको थियो। कार्यक्रममा सहभागी केही व्यक्तिले अपांगता भएका व्यक्ति र स्पाइनल मस्क्युलर एट्रोफीको उपचारमा लाग्ने उच्च खर्चलाई लिएर अश्लील तथा असंवेदनशील टिप्पणी गरेको आरोप लागेको थियो।

त्यसपछि उनीहरूविरुद्ध विभिन्न स्थानमा आपराधिक मुद्दा तथा एफआईआर दर्ता भएका थिए। एउटा गैरसरकारी संस्थाले समेत सर्वोच्च अदालतमा निवेदन दायर गर्दै असंवेदनशील टिप्पणीप्रति आपत्ति जनाएको थियो।

सामाजिक काम गर्न निर्देशन

यसअघि नोभेम्बर २०२५ मा सर्वोच्च अदालतले समय रैना तथा मुद्दामा नाम जोडिएका अन्य कमेडियनलाई अपांगता भएका व्यक्तिको उपचारका लागि स्थापना गरिएको कोषमा रकम जुटाउन एक महिनामा कम्तीमा दुईवटा कार्यक्रम आयोजना गर्न निर्देशन दिएको थियो।

पछिल्लो आदेशमा अदालतले उनीहरूले अपांगता भएका व्यक्तिलाई सहयोग गर्ने उद्देश्यले गरेका सामाजिक प्रयासलाई सकारात्मक रूपमा लिँदै आपराधिक मुद्दा खारेज गरेको हो।

Originally published on abcnews.com.np.