बैतडी । रोजगारीका लागि युवापुस्ता विदेशिने क्रम बढिरहेका बेला बैतडीका प्रेमबहादुर विष्ट मौरीपालन व्यवसायमा लागेका छन्।

सुर्नया गाउँपालिका–७ मालम बगरका विष्टसँग अहिले ५० वटा मौरीका घार छन्। २५ वर्षदेखि मौरीपालन गर्दै आएका उनले वार्षिक करिब दुई क्विन्टल मह उत्पादन गर्दै आएका छन्।

स्थानीय बजारमै प्रतिकिलो १ हजार ५०० रुपैयाँसम्ममा मह बिक्री हुने गरेको र महबाट वार्षिक अढाइदेखि तीन लाख रुपैयाँसम्म आम्दानी हुने विष्टले बताए।

उनका अनुसार चैत–वैशाख र कात्तिक–मङ्सिर गरी वर्षमा दुईपटक मह निकालिन्छ। एकपटकमा एक क्विन्टलभन्दा बढी मह उत्पादन हुने गरेको उनले बताए।

घार राख्न ठाउँकै अभाव

विष्टले स्थानीय काठबाट बनाइएका परम्परागत घार प्रयोग गर्दै आएका छन्। घरमा घार राख्ने ठाउँ अभाव भएपछि सडक किनार र भिरपाखामा समेत घार राख्नुपर्ने अवस्था रहेको उनले बताए।

“व्यवसाय बढाउँदै यहाँसम्म ल्याएको छु। घार राख्ने ठाउँ नभएर सडक किनार र भिरपाखामा पनि राखेको छु,” उनले भने।

परम्परागत घारका कारण मौरी संरक्षणमा भने समस्या हुने गरेको छ। आधुनिक घारको अभावमा वर्षायामको चिसो तथा जङ्गली जनावरबाट मौरी जोगाउन कठिन हुने उनको भनाइ छ।

विषादीले थपियो चुनौती

तरकारी खेतीमा प्रयोग हुने विषादीका कारण पछिल्लो समय मौरीपालनमा थप चुनौती देखिएको विष्टले बताए।

फूलमा चर्न जाने मौरी विषादी प्रयोग गरिएका क्षेत्रमा पुग्दा मर्ने गरेको उनको भनाइ छ। बजारमा महको माग राम्रो रहेकाले आधुनिक प्रविधि र आवश्यक सहयोग पाए मौरीपालनलाई थप विस्तार गर्न सकिने उनले बताए।

मौरीपालनसँगै विष्टले बाख्रापालन व्यवसायसमेत गर्दै आएका छन्।

Originally published on abcnews.com.np.