असारमा रोपाइँ गरिएको धानमा युरिया मल हाल्ने समय भइसक्दा पनि जिल्लामा मलको अभाव भएपछि किसानहरू भारततर्फ निर्भर हुन थालेका हुन्। अहिले धानमा फूल लाग्ने समय भएकाले मलको आवश्यकता बढी भए पनि स्थानीय बजारमा सहज रूपमा मल नपाइएको किसानहरूको गुनासो छ।

किसान हरिलाल चौधरीले नेपालमा मल नपाएपछि बाध्य भएर भारतबाट ल्याउनुपरेको बताउनुभयो। उहाँले भन्नुभयो, “मल नपाएपछि के गर्ने ? लुकीछिपी भए पनि भारतबाट ल्याउनै पर्छ।”

सीमावर्ती क्षेत्रमा बढ्यो चहलपहल

मलको अभावसँगै कैलालीको सीमावर्ती क्षेत्रमा भारतबाट युरिया मल ल्याउने किसानको चहलपहल बढेको छ। मोहना नदी आसपास भारतीय व्यापारीले मल बोकेर सीमासम्म ल्याउने गरेको किसानहरूले बताएका छन्।

भारततर्फका व्यापारीले टाउकोमा बोरा बोकेर सीमासम्म मल ल्याउने र त्यसबापत पारिश्रमिकसमेत लिने भएकाले नेपाली किसानलाई थप महँगो पर्ने गरेको छ।

सीमावर्ती क्षेत्रमा भेटिएका एक किसानका अनुसार नेपालमा प्रतिबोरा करिब एक हजार एक सय रुपैयाँमा पाइने युरिया मल भारतबाट ल्याउँदा दुई हजारदेखि दुई हजार पाँच सय रुपैयाँसम्म तिर्नुपरेको छ।

समयमै मल नपाउँदा उत्पादन घट्ने चिन्ता

धानबालीमा आवश्यक समयमा मल प्रयोग गर्न नपाउँदा उत्पादनमा असर पर्ने भन्दै किसानहरू चिन्तित छन्। समयमै युरिया मल उपलब्ध नहुँदा धानको वृद्धि कमजोर हुनुका साथै उत्पादनसमेत घट्न सक्ने उनीहरूको भनाइ छ।

किसानहरूले सरकारले खेतीको मुख्य समयमा समेत पर्याप्त रासायनिक मल उपलब्ध गराउन नसकेको भन्दै गुनासो गरेका छन्। उनीहरूले तत्काल मलको आपूर्ति सहज बनाउन सरकारसँग माग गरेका छन्।