काठमाडौं । नेपाली कांग्रेसभित्र बढ्दो आन्तरिक विवादका बीच संस्थापनइतर पक्षका नेता डा. शेखर कोइरालाले पूर्वसभापति शेरबहादुर देउवासँग भेटवार्ता गरेका छन्। देउवा निवासमै भएको भेटमा पार्टीभित्रको पछिल्लो विवाद, आन्तरिक समीकरण र पार्टी एकताको विषयमा छलफल भएको बताइएको छ।

कोइरालाका सचिवालय सदस्य दिनेशचन्द्र थपलियाका अनुसार दुवै नेता नेपाली कांग्रेसलाई विभाजन र थप ध्रुवीकरणतर्फ जान नदिई एकताबद्ध बनाएर अघि बढाउनुपर्ने पक्षमा देखिएका छन्।

तर, पार्टीभित्रको विवाद समाधान र एकताको पहल केवल देउवा र कोइरालाको इच्छाले मात्र सम्भव नहुने उनको भनाइ छ।

“दुवै नेता पार्टी मिलाउने पक्षमा हुनुहुन्छ। तर, मिल्ने–मिलाउने उहाँहरूको हातमा छैन। बल त सभापति गगन थापाको हातमा छ। उहाँले पहल गर्नुपर्‍यो,” थपलियाले बताएका छन्।

देउवाको सकारात्मक सन्देश

भेटका क्रममा पूर्वसभापति देउवाले पार्टीभित्रको विवाद समाधान गरी एकता कायम गर्नुपर्ने विषयमा सकारात्मक सन्देश दिएको थपलियाले बताए।

कांग्रेसभित्र पछिल्लो समय संस्थापन र संस्थापनइतर समूहबीच देखिएको मतभेद र शक्ति संघर्षका बीच शेखर–देउवा भेटलाई अर्थपूर्ण रूपमा हेरिएको छ। विशेषगरी पार्टी नेतृत्व, आन्तरिक व्यवस्थापन र आगामी राजनीतिक दिशाबारे विभिन्न धारणा सार्वजनिक भइरहेका बेला दुई प्रभावशाली नेताबीच भएको संवादले कांग्रेसभित्र नयाँ समीकरण बन्न सक्ने चर्चा पनि बढाएको छ।

देउवा र शेखर एकताको पक्षमा उभिए पनि अब पार्टीभित्रको गाँठो फुकाउने निर्णायक पहल सभापति गगन थापाबाट हुन्छ कि हुँदैन भन्नेमा कांग्रेसको आगामी राजनीति निर्भर रहने देखिएको छ।

Originally published on abcnews.com.np.