पोखरा । नयाँलिपि न्युज डटकमको आयोजनामा गण्डकी प्रदेशस्तरीय मिडिया कप फुटसल प्रतियोगिता २०८३ आगामी असोज २ र ३ गते हुने भएको छ।

पोखरा रंगशालाको मल्टिपर्पोज खेल मैदानमा प्रतियोगिता सञ्चालन हुने आयोजकले जनाएको छ। नयाँलिपि न्युज डटकमका अध्यक्ष सुरज श्रेष्ठका अनुसार प्रतियोगितामा सहभागी हुन चाहने टोलीले भदौ २० गतेभित्र दर्ता गरिसक्नुपर्नेछ।

प्रतियोगिताको विजेता टोलीले ५० हजार रुपैयाँ तथा उपविजेता टोलीले ३० हजार रुपैयाँ नगद पुरस्कार प्राप्त गर्नेछन्। दुवै टोलीलाई सिल्ड, प्रमाणपत्र र मेडलसमेत प्रदान गरिनेछ।

सर्वोत्कृष्ट खेलाडी, सर्वोत्कृष्ट प्रशिक्षक र सर्वोत्कृष्ट गोलकिपरलाई जनही ५ हजार रुपैयाँ पुरस्कार प्रदान गरिने आयोजकले जनाएको छ। यस्तै, प्रत्येक खेलको ‘म्यान अफ द म्याच’ घोषित हुने खेलाडीलाई १ हजार ५०० रुपैयाँ पुरस्कार दिइनेछ।

प्रतियोगितामा सहभागी हुने खेलाडीले पासपोर्ट साइजको फोटो, नेपाल पत्रकार महासंघ वा सूचना विभागको परिचयपत्रको प्रतिलिपि तथा सम्बन्धित जिल्लाको पत्रकार महासंघबाट प्रतियोगितामा सहभागी हुन पाउने व्यहोराको पत्र पेश गर्नुपर्नेछ।

प्रत्येक टोलीमा ८ जना खेलाडी र २ जना अफिसियल गरी १० जना सदस्य रहनेछन्। गण्डकी प्रदेशका जुनसुकै जिल्लामा कार्यरत पत्रकारले प्रतियोगितामा सहभागी हुन पाउने आयोजकले जनाएको छ।

Originally published on abcnews.com.np.