काठमाडौं । अस्ट्रेलियामा जारी टप एन्ड टी–२० सिरिजको दोस्रो खेलमा नेपाल ‘ए’ले बंगलादेश हाई–परफर्मेन्स टोलीलाई जितका लागि १०० रनको लक्ष्य दिएको छ।

डार्विनस्थित मरारा क्रिकेट मैदानमा टस हारेर पहिले ब्याटिङको निम्तो पाएको नेपालले निर्धारित २० ओभरमा नौ विकेट गुमाउँदै ९९ रन बनाएको हो।

नेपालका लागि कुशल भुर्तेलले सर्वाधिक ४६ रनको योगदान दिए। उनले ४० बल खेल्दै तीन चौका र एक छक्का प्रहार गरे। अन्य ब्याटरले भने उल्लेख्य योगदान गर्न सकेनन्।

विपिन खत्री ११ रनमा अविजित रहे भने साहब आलमले ११ तथा रिजन ढकालले १० रन जोडे।

बंगलादेश हाई–परफर्मेन्सका एमडी रुबेल नेपालका ब्याटरमाथि हाबी भए। उनले चार विकेट लिए। रिपान मण्डल, रोहनत डोउल्लाह ब्रोसन र समिउन बसिरले समान एक–एक विकेट लिए।

नेपाल ‘ए’ यस खेलमार्फत प्रतियोगितामा पहिलो जितको खोजीमा छ। यसअघि भएको पहिलो खेलमा नेपाल ‘ए’ आयोजक नर्दन टेरिटोरी स्ट्राइक्ससँग आठ विकेटले पराजित भएको थियो।

Originally published on abcnews.com.np.