खोटाङ । हलेसी तुवाचुङ नगरपालिकाका घरविहीन तीन विपन्न परिवारले भूकम्प प्रतिरोधी नयाँ घर पाएका छन्। आफ्नै लगानीमा घर निर्माण गर्न नसक्ने परिवारलाई नगरपालिकाले प्रतिपरिवार पाँच लाख रुपैयाँ लगानीमा दुईकोठे एकतले घर निर्माण गरी हस्तान्तरण गरेको हो।

नगरपालिकाले वडा नं. २ डिकुवाका देशवीर राई, वडा नं. ६ मङ्गलटारका भया दमाई र वडा नं. १० अर्खौलेका टेकबहादुर सार्कीलाई नयाँ घर हस्तान्तरण गरेको हो।

लामो समयदेखि जीर्ण घरमा बस्दै आएका राई वृद्ध दम्पतीका लागि नगरपालिकाले सुरक्षित आवास निर्माण गरेको हो। त्यस्तै, अपाङ्गता भएका चामे दमाई र भया दमाई दाजुबहिनीका लागि पनि नयाँ घर निर्माण गरिएको छ।

अर्खौलेका टेकबहादुर सार्कीको परिवार लामो समयदेखि गाउँबाहिर बस्दै आएको थियो। करिब १२ वर्षअघि गाउँ छाडेका उनीहरू गत वर्ष भदौमा अर्खौले फर्किएपछि अरूको घरमा आश्रय लिएर बस्दै आएका थिए। घर अभावका कारण समस्यामा परेका सार्की परिवारलाई नगरपालिकाले यसअघि खाद्यान्न तथा नगद सहयोगसमेत गरेको थियो।

सुरक्षित आवासको सुनिश्चितता

नगर प्रमुख विमला राईका अनुसार सुरक्षित नागरिक आवास कार्यक्रमअन्तर्गत तीन विपन्न परिवारका लागि भूकम्प प्रतिरोधी घर निर्माण गरी हस्तान्तरण गरिएको हो।

“नगरपालिकाभित्रका नागरिकको सुरक्षित आवासको सुनिश्चितता गर्न तीन विपन्न परिवारका लागि भूकम्प प्रतिरोधी नयाँ घर निर्माण गरेर हस्तान्तरण गरेका छौँ,” प्रमुख राईले भनिन्।

उनका अनुसार घरको अभावमा अरूको सहारामा बस्दै आएका परिवारलाई क्रमशः सुरक्षित आवासको व्यवस्था गरिनेछ।

नगरपालिकाले राजधानी काठमाडौँ तथा तराईका विभिन्न जिल्लामा अस्थायी रूपमा बसोबास गर्दै आएका र घरटहरा हटाइएपछि विस्थापित भएका नगरवासीलाई समेत पुनःस्थापनाका लागि घर निर्माण गरिदिने निर्णय गरेको छ।

नगरपालिका फर्किएर स्थायी रूपमा बसोबास गर्न चाहने विस्थापित परिवारका लागि पाँच लाख रुपैयाँसम्मको लागतमा भूकम्प प्रतिरोधी घर निर्माण गरिने जनाइएको छ। त्यसका लागि सम्बन्धित परिवारको नाममा जग्गा भने हुनुपर्नेछ।

नगरपालिकाको १३६औँ कार्यपालिका बैठकले तीन विपन्न परिवारका लागि भूकम्प प्रतिरोधी घर निर्माण गर्ने निर्णय गरेको थियो।

Originally published on abcnews.com.np.