काठमाडौं । हङकङको साईकुङस्थित लोकप्रिय हाई आइल्यान्ड जियो ट्रेलको पोपिन चाउ खण्डमा अब दैनिक अधिकतम २ हजार पर्यटकलाई मात्रै प्रवेश दिइने भएको छ।

कृषि, मत्स्य तथा संरक्षण विभागले आगामी महिनादेखि पर्यटकको संख्या व्यवस्थापन गर्न कोटा प्रणाली लागू गर्ने घोषणा गरेको हो। युनेस्को ग्लोबल जियोपार्क क्षेत्रमा पर्ने यो पदमार्ग षट्कोणीय आकारका विशाल ज्वालामुखी चट्टानका लागि प्रसिद्ध छ।

विभागका अनुसार बिदाका दिनमा पदमार्गमा पर्यटकको चाप अत्यधिक बढ्ने गरेको छ। केही खण्डमा पदमार्गको क्षमता लगभग भरिने अवस्था देखिएपछि भिड व्यवस्थापन तथा वातावरण संरक्षणका लागि कोटा प्रणाली लागू गर्न लागिएको हो।

यसअघि विभागले अप्रिलमा पर्यटकको संख्या सीमित गर्ने प्रस्ताव अघि सारेको थियो। नयाँ व्यवस्थाअनुसार पदमार्ग प्रवेशका लागि अग्रिम बुकिङ गर्नुपर्नेछ। हाललाई बुकिङका लागि कुनै शुल्क लाग्ने छैन भने बुकिङ गरेर उपस्थित नभए पनि जरिवाना गरिने छैन।

विभागका निर्देशक मिकी लाई किनलाई उद्धृत गर्दै साउथ चाइना मर्निङ पोस्टले आरक्षण प्रणालीले पर्यटकको भिड व्यवस्थापन गर्नुका साथै आगन्तुकलाई एउटै स्थानमा केन्द्रित हुन नदिने र वातावरण संरक्षणमा सहयोग पुग्ने जनाएको छ।

साँघुरो पदमार्गमा अत्यधिक आवतजावतका कारण हुन सक्ने क्षति रोक्नु पनि कोटा प्रणालीको उद्देश्य रहेको विभागले जनाएको छ। पर्यटकको संख्या तोक्ने व्यवस्थालाई आवश्यकता अनुसार आगामी दिनमा परिमार्जन गर्दै जाने निर्देशक लाईले बताएका छन्।

करिब एक किलोमिटर लामो पोपिन चाउ पदमार्ग समुद्रबाट नाटकीय रूपमा माथि उठेका विशाल षट्कोणीय ज्वालामुखी चट्टान हुँदै अघि बढ्छ। यहाँबाट पर्यटकले चट्टानहरूलाई नजिकबाट अवलोकन गर्नुका साथै विभिन्न प्लेटफर्मबाट मनोरम दृश्यसमेत हेर्न सक्नेछन्।

Originally published on abcnews.com.np.