उदयपुर । उदयपुरगढी गाउँपालिकामा अवस्थित ऐतिहासिक उदयपुरगढी दरबार क्षेत्रको ड्रोनबाट खिचिएको आकर्षक तस्बिर सार्वजनिक भएको छ। पहाडी भूभागको उचाइमा अवस्थित ऐतिहासिक गढी र आसपासको प्राकृतिक दृश्य तस्बिरमा देख्न सकिन्छ।

इतिहासअनुसार १४औँ शताब्दीदेखि १६औँ शताब्दीसम्म सेन वंशले उदयपुरगढीलाई आफ्नो शासन केन्द्रका रूपमा प्रयोग गरेको उल्लेख छ। यही ऐतिहासिक गढीको नामबाट जिल्लाको नाम उदयपुर रहन गएको बताइन्छ।

उदयपुर जिल्लाको सदरमुकाम पनि पहिले उदयपुरगढीमै रहेको थियो। पछि प्रशासनिक तथा भौगोलिक सुविधालाई ध्यानमा राख्दै विसं २०२८ सालपछि जिल्लाको सदरमुकाम गाईघाट सारिएको हो।

ऐतिहासिक, पुरातात्त्विक र पर्यटकीय महत्व बोकेको उदयपुरगढी आज पनि जिल्लाको महत्वपूर्ण सम्पदामध्ये एक मानिन्छ। गढी क्षेत्रको संरक्षण, प्रवर्द्धन र पर्यटन विकासका लागि स्थानीयस्तरमा समेत विभिन्न प्रयास भइरहेका छन्।

Originally published on abcnews.com.np.