बुटवल । लुम्बिनी प्रदेशका मुख्यमन्त्री चेतनारायण आचार्यले मन्त्रिपरिषद् पुनर्गठन गर्दै तीनजना नयाँ मन्त्री नियुक्तिका लागि प्रदेश प्रमुखसमक्ष सिफारिस गरेका छन्। नेपाली कम्युनिस्ट पार्टी (नेकपा)बाट तीन मन्त्री थप्दै सरकारको मन्त्रिपरिषद् पुनर्गठन गर्न लागिएको हो।
नेपालको संविधानको धारा १६८ को उपधारा (९) बमोजिम मुख्यमन्त्री आचार्यले मन्त्रिपरिषद्को पुनर्गठन तथा कार्यविभाजनका लागि प्रदेश प्रमुखसमक्ष सिफारिस गरेका हुन्।
मुख्यमन्त्री आचार्यको सिफारिसअनुसार दीपेन्द्रकुमार पुनलाई स्वास्थ्य मन्त्रालय, इन्द्रजीत थारूलाई आर्थिक मामिला तथा योजना मन्त्रालय र कृष्णा कुश्मा थारूलाई कृषि, भूमि व्यवस्था तथा सहकारी मन्त्रालयको जिम्मेवारी दिने प्रस्ताव गरिएको छ।
नवनियुक्त मन्त्रीहरूको पद तथा गोपनीयताको शपथग्रहण प्रदेश प्रमुखको कार्यालय बुटवलमा मंगलबार दिउँसो ३ः२५ बजे हुने जनाइएको छ।
पुराना मन्त्रीको पनि जिम्मेवारी हेरफेर
मन्त्रिपरिषद् पुनर्गठनसँगै केही मन्त्रीहरूको जिम्मेवारी पनि हेरफेर गरिएको छ।
सिफारिस गरिएको नयाँ कार्यविभाजनअनुसार तुलसीप्रसाद चौधरीलाई वन, वातावरण तथा पर्यटन मन्त्रालय, रामजीप्रसाद घिमिरेलाई सामाजिक विकास मन्त्रालय, सन्तोषकुमार पाण्डेयलाई शहरी विकास, ऊर्जा, सिँचाइ तथा खानेपानी मन्त्रालय, रत्नबहादुर खत्रीलाई भौतिक पूर्वाधार विकास मन्त्रालय तथा भण्डारीलाल अहिरलाई आन्तरिक मामिला, कानुन, उद्योग तथा यातायात मन्त्रालयको जिम्मेवारी तोकिएको छ।
यसअघि स्वास्थ्य मन्त्रालय सम्हालिरहेका घिमिरेलाई सामाजिक विकास मन्त्रालयमा सारिएको छ भने कृषि, भूमि व्यवस्था तथा सहकारी मन्त्रालयको जिम्मेवारीमा रहेका चौधरीलाई वन, वातावरण तथा पर्यटन मन्त्रालय दिइएको छ।
त्यस्तै, सामाजिक विकास मन्त्रालय सम्हाल्दै आएका पाण्डेयलाई शहरी विकास, ऊर्जा, सिँचाइ तथा खानेपानी मन्त्रालयको जिम्मेवारी दिने प्रस्ताव गरिएको छ।
दलगत सहमतिअनुसार मन्त्रिपरिषद् विस्तार
वर्तमान सत्ता गठबन्धनबीच भएको सहमतिअनुसार नेकपा (एमाले)बाट मुख्यमन्त्रीसहित चारजना मन्त्री, नेपाली कम्युनिस्ट पार्टी (नेकपा)बाट तीनजना मन्त्री तथा जनता समाजवादी पार्टी, नेपालबाट दुईजना मन्त्री रहने गरी मन्त्रिपरिषद् गठन तथा पुनर्गठनको तयारी गरिएको हो।
तीन नयाँ मन्त्रीको नियुक्तिसँगै लुम्बिनी प्रदेश सरकारको सत्ता समीकरणअनुसार मन्त्रिपरिषद्ले पूर्णता पाउने अपेक्षा गरिएको छ।
Originally published on abcnews.com.np.
प्रतिक्रिया दिनुहोस्