काठमाडौं । रसुवास्थित भोटेकोशी नदीमा बुधबार बिहान आएको भीषण बाढीमा परी बेपत्ता भएकामध्ये बिहीबार राति १० बजेसम्म ३८९ जनाको शव फेला परेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार बाढीपछि अझै ९७७ जना सम्पर्कविहीन रहेका छन्।

प्राधिकरणले सार्वजनिक गरेको विवरणअनुसार बाढीले रसुवा र आसपासका जिल्लासहित त्रिशूली नदीको तटीय क्षेत्रमा ठूलो मानवीय क्षति पुर्‍याएको छ। बाढीमा परी ज्यान गुमाएकामध्ये सबैभन्दा धेरै शव चितवनमा फेला परेका छन्।

चितवनमा १३७ जनाको शव फेला परेको छ भने नवलपरासी पूर्वमा ८७ जनाको शव संकलन गरिएको छ। यस्तै, धादिङमा ३३ जना, गोरखामा विभिन्न मानव अंगसहित ३२ जना, नुवाकोटमा २८ जना, तनहुँमा २८ जना र नवलपरासी पश्चिममा २७ जनाको शव फेला परेको प्राधिकरणले जनाएको छ।

रसुवा जिल्लामा १७ जनाको शव फेला परेको छ। बाढीको मूल प्रभावित क्षेत्र रसुवा भए पनि नदीको तीव्र बहावले शवहरू तल्लो तटीय जिल्लासम्म पुर्‍याएकाले विभिन्न जिल्लामा खोज तथा शव संकलन कार्य जारी रहेको छ।

बाढीपछि ठूलो संख्यामा सुरक्षाकर्मी तथा सरकारी कार्यालयका कर्मचारीसमेत सम्पर्कविहीन भएका छन्। प्राधिकरणका अनुसार नेपाल प्रहरीका २८ जना, नेपाली सेनाका ४५ जना र सशस्त्र प्रहरी बल नेपालका १३ जना अझै सम्पर्कमा आएका छैनन्।

यसैगरी, अध्यागमन कार्यालयका चार जना र भन्सार कार्यालयका १५ जना पनि सम्पर्कविहीन रहेको विवरणमा उल्लेख छ। रसुवा जिल्लाबाट १६१ जना र मकवानपुर जिल्लाबाट ६६ जना अझै सम्पर्कमा नआएको सम्बन्धित जिल्ला विपद् व्यवस्थापन निकायबाट प्राप्त विवरणमा उल्लेख गरिएको छ।

बाढीको प्रभाव विदेशी नागरिकमाथि समेत परेको छ। प्रभावित क्षेत्रमा रहेका ५१७ जना विदेशी नागरिक तथा नेपाल भ्रमणमा आएका तर विदेशमै बसोबास गर्दै आएका १२७ जना नेपाली नागरिक पनि अझै सम्पर्कविहीन रहेको प्राधिकरणले जनाएको छ। नुवाकोटबाट थप एक जना बेपत्ता रहेको विवरण पनि प्राप्त भएको छ।

बाढीमा परी घाइते हुनेको संख्या भने ७३ पुगेको छ। घाइतेमध्ये रसुवामा ४३ जना, नुवाकोटमा २७ जना र धादिङमा तीन जना रहेका छन्। उनीहरूलाई उद्धार गरी विभिन्न अस्पतालमा उपचारका लागि पठाइएको प्राधिकरणले जनाएको छ।

भोटेकोशीमा आएको भीषण बाढीपछि नेपाली सेना, नेपाल प्रहरी, सशस्त्र प्रहरी बल तथा स्थानीय प्रशासन खोज, उद्धार र राहत कार्यमा निरन्तर खटिएका छन्। नदीको तटीय क्षेत्रका विभिन्न स्थानमा शव खोजी तथा पहिचानको काम जारी रहेकाले मृतक र सम्पर्कविहीनको संख्या थप परिवर्तन हुन सक्ने प्राधिकरणले जनाएको छ।

Originally published on abcnews.com.np.