काठमाडौँ । काठमाडौँ महानगरपालिकाले भोटेकोशी बाढीबाट प्रभावित नागरिकको उद्धार, उपचार तथा राहतका लागि सक्रिय रूपमा काम अघि बढाउने भएको छ। महानगरपालिकाकी कार्यवाहक प्रमुख सुनिता डङ्गोलले त्रिभुवन विश्वविद्यालय शिक्षण अस्पताल र राष्ट्रिय ट्रमा सेन्टरमा उपचाररत बाढी प्रभावित घाइते तथा बेपत्ता आफन्तका परिवारसँग भेटघाट गर्दै आवश्यक सहयोग गर्ने प्रतिबद्धता जनाएकी हुन्। डङ्गोल नेतृत्वको टोलीले दुवै अस्पताल पुगेर घाइतेको स्वास्थ्य अवस्था, उपचारको व्यवस्था तथा औषधि र उपकरणको उपलब्धताबारे जानकारी लिएको थियो। डङ्गोलले अहिले राष्ट्रिय सङ्कटको अवस्था रहेकाले नागरिकको जीवनरक्षा, घाइतेको उपचार तथा राहत कार्यलाई प्राथमिकतामा राखिएको बताइन्। उनले परिवार तथा आफन्त गुमाएका व्यक्तिलाई महानगरपालिकाले आवश्यक सहयोग गर्ने बताइन्। त्रिवि शिक्षण अस्पतालका उपनिर्देशक डा. पवनराज चालिसेले विपद्का कारण आकस्मिक स्वास्थ्य सेवामा चाप बढेकाले औषधि तथा अन्य अत्यावश्यक सामग्रीको थप व्यवस्था गर्नुपर्ने अवस्था रहेको जानकारी दिए। यस्तै, राष्ट्रिय ट्रमा सेन्टरका प्रमुख मेडिकल सुपरिटेन्डेन्ट डा. रुद्र मरासिनीले उपचाररत घाइतेहरूको अवस्थाबारे महानगरको टोलीलाई जानकारी गराएका थिए। कार्यवाहक प्रमुख डङ्गोलले भोटेकोशी बाढीबाट भएको क्षति निकै ठूलो रहेको उल्लेख गर्दै प्रभावित नागरिकलाई तत्काल राहत उपलब्ध गराउन महानगरपालिका प्रतिबद्ध रहेको बताइन्। उनले घाइतेको उपचार खर्चमा सहयोग गर्नुका साथै बेपत्ता भएका व्यक्तिका परिवारलाई खोज तथा उद्धार कार्यमा आवश्यक सहयोग गर्ने आश्वासन दिएकी छन्।

Originally published on abcnews.com.np.