बागलुङ । रसुवाको भोटेकोशी नदीमा आएको भीषण बाढीमा परी सम्पर्कविहीन हुने बागलुङका नागरिकको संख्या बढेर १६ पुगेको छ।

जिल्ला प्रहरी कार्यालय बागलुङले शुक्रबार सार्वजनिक गरेको विवरणअनुसार रोजगारी, व्यापार तथा अन्य कामका सिलसिलामा रसुवा र नुवाकोट पुगेका २ बालबालिका, १ महिला र १३ पुरुष बाढीपछि सम्पर्कविहीन भएका हुन्।

प्रहरी नायव उपरीक्षक रामेश्वर त्वातीका अनुसार बेपत्ता भएकामध्ये १२ जना रसुवा र ४ जना नुवाकोट क्षेत्रमा रहेको विवरण प्राप्त भएको छ। उनीहरूको सम्बन्धित जिल्लाका सुरक्षा निकायसँग समन्वय गरी खोजी भइरहेको प्रहरीले जनाएको छ।

यसअघि बुधबारसम्म पश्चिम बागलुङको तमानखोला गाउँपालिकाका ९ जना र ढोरपाटन नगरपालिकाका १ जना गरी १० जना बेपत्ता भएको जानकारी आएको थियो। पछिल्लो विवरणमा थप व्यक्तिहरू सम्पर्कविहीन रहेको खुलेपछि संख्या १६ पुगेको हो।

अपर त्रिशूली आयोजनामा कार्यरत ९ जना

तमानखोला गाउँपालिकाका बेपत्ता ९ जना अपर त्रिशूली जलविद्युत् आयोजनाको ड्याम साइट हाकुवेशीमा कार्यरत रहेको गाउँपालिका अध्यक्ष जोकलाल बुढाले जानकारी दिएका छन्।

बेपत्ता हुनेमा तमानखोला–१ बोङ्गादोभानका ३७ वर्षीय पदमबहादुर घर्तीमगर, सोही ठाउँका ३२ वर्षीय इन्द्रकुमार विक, रिक्लाङ्कका २२ वर्षीय विष्णु घर्तीमगर, तमानखोला–२ बोंगाखानीका ३७ वर्षीय भीमबहादुर छन्त्याल र ५२ वर्षीय खड्ग छन्त्याल छन्।

त्यस्तै तमानखोला–३ तमानका २२ वर्षीय संजय शिर्पाली र ५० वर्षीय दलप्रसाद बुढा तथा तमानखोला–४ लाम्मेलाका ५८ वर्षीय लाता कामी र ४७ वर्षीय भीमबहादुर विक पनि सम्पर्कविहीन छन्।

रसुवामा काम गर्दै आएका तीन जना पनि बेपत्ता

ढोरपाटन नगरपालिका–९ बोबाङका २० वर्षीय तुलबहादुर विक पनि बाढीपछि सम्पर्कविहीन छन्। परिवारका अनुसार उनी पछिल्लो पाँच वर्षदेखि रसुवाको स्याफ्रुबेँसी बजारस्थित एक होटलमा काम गर्दै आएका थिए।

त्यस्तै ढोरपाटन–४ सिमिकाका २३ वर्षीय विजेन्द्र घर्ती र गलकोट नगरपालिका–२ नरेठाँटीका २७ वर्षीय रमेश सुनार पनि बेपत्ता रहेको प्रहरीले जनाएको छ।

नुवाकोटमा एकै परिवारका चार जना बेपत्ता

नुवाकोट क्षेत्रमा आएको बाढीमा परी बागलुङ नगरपालिका–९ तित्याङ, साल्बोटका एकै परिवारका चार जना सम्पर्कविहीन भएका छन्।

प्रहरीका अनुसार ३३ वर्षीय इन्जिनियर राजेश शर्मा पौडेल, उनकी ३१ वर्षीया श्रीमती इन्जिनियर प्रमिला पाठक तथा उनीहरूका पाँच वर्षीय जुम्ल्याहा छोराछोरी आदित्य र अदिती शर्मा पौडेल बाढीपछि बेपत्ता छन्।

बाढी प्रभावित क्षेत्रमा खोज तथा उद्धार कार्य जारी रहेकाले बेपत्ता व्यक्तिहरूको अवस्था पत्ता लगाउन सम्बन्धित सुरक्षा निकायसँग समन्वय भइरहेको प्रहरीले जनाएको छ।

प्रहरीले बेपत्ता व्यक्तिबारे थप जानकारी प्राप्त भए सम्बन्धित निकायमा जानकारी गराउन सर्वसाधारणलाई आग्रह गरेको छ।

Originally published on abcnews.com.np.