काठमाडौं । नेपाली बजारमा सुनको भाउ आज थप घटेको छ । नेपाल सुनचाँदी व्यवसायी महासंघका अनुसार सुनको मूल्य आज तोलामा ५ सय रुपैयाँले घटेर ३ लाख ६ हजार १ सय रुपैयाँ कायम भएको छ । यससँगै सुनको भाउ लगातार पाँचौँ दिन घटेको हो ।

गत आइतबार एकैदिन तोलामा ९ हजार ५ सय रुपैयाँ घटेको सुनको भाउ सोमबार थप २ हजार ४ सय रुपैयाँ घटेर ३ लाख ६ हजार ६ सय रुपैयाँमा झरेको थियो । यसअघि गत शुक्रबार तोलामा २ हजार ४ सय रुपैयाँ र बिहीबार १ हजार २ सय रुपैयाँले सुनको मूल्य घटेको थियो । आजको समेत हिसाब गर्दा पाँच दिनमा सुन तोलामा १६ हजार रुपैयाँले सस्तिएको छ ।

यसैगरी चाँदीको मूल्य पनि आज तोलामा १५ रुपैयाँले घटेर ४ हजार ७ सय ६५ रुपैयाँ कायम भएको महासंघले जनाएको छ ।

यसअघि गत माघ १५ गते सुनको मूल्य तोलामा २० हजार ५ सय रुपैयाँले बढेर ३ लाख ३९ हजार ३ सय रुपैयाँ पुगेको थियो । नेपाली बजारमा सुनको यो मूल्य हालसम्मकै उच्च हो ।

त्यस्तै गत माघ १८ गते चाँदीको मूल्य तोलामा १ हजार ५ सय ६५ रुपैयाँले घटेको थियो । चाँदीको मूल्यमा आएको यो गिरावट पनि हालसम्मकै ठूलो दैनिक गिरावट हो । गत माघ १५ गते चाँदीको मूल्य तोलाको ७ हजार ५ सय ५ रुपैयाँ पुगेको थियो, जुन नेपाली बजारमा चाँदीको हालसम्मकै उच्च मूल्य हो ।

Originally published on abcnews.com.np.