काठमाडौँ  । भोटेकोशी बाढीबाट प्रभावित क्षेत्रमा नेपाली सेनाले हवाई तथा जमिनी माध्यमबाट खोज तथा उद्धार अभियानलाई तीव्र बनाएको छ । नेपाली सेनाका अनुसार मङ्गलबार बिहान ११ बजेसम्म हवाई साधनमार्फत थप २३ जनाको उद्धार गरिएको छ ।

बाढीबाट प्रभावित जलविद्युत् आयोजनाका सुरुङमा फसेका तथा सम्पर्कविहीन व्यक्तिको खोजीका लागि विदेशी विज्ञसहितको संयुक्त टोलीसमेत परिचालन गरिएको छ । जोखिमपूर्ण अवस्थाका बीच टोलीले विभिन्न आयोजनाका सुरुङभित्र प्रवेश गरी खोज तथा उद्धारको प्रयास गरिरहेको सेनाले जनाएको छ ।

नेपाली सेनाका अनुसार चिलिमे जलविद्युत् आयोजनाको सुरुङमा उद्धार टोली करिब ५० मिटरभित्र प्रवेश गरेर खोजी गरेको छ ।

त्यस्तै, लाङटाङ जलविद्युत् आयोजनाको सुरुङमा करिब १५० मिटर र अपर त्रिशूली–१ जलविद्युत् आयोजनाको सुरुङमा करिब २०० मिटरसम्म प्रवेश गरी खोज तथा उद्धार कार्य गरिएको छ ।

त्रिशूली–३ ‘ए’ जलविद्युत् आयोजनाको सुरुङको टनेल हेड फेला पारिएपछि कम्प्रेसरमार्फत सुरुङभित्र हावा पठाउने काम भइरहेको छ । सुरुङभित्र जमेको पानी बाहिर निकाल्ने प्रयाससमेत जारी रहेको सेनाले जनाएको छ ।

उद्धारका लागि तीनवटा एक्स्काभेटर प्रयोग गरी सुरुङको पछाडितर्फ करिब १५ मिटर वैकल्पिक मार्ग खोलिएको छ । सुरुङभित्र प्रवेश गर्ने बाटो बनाउन रक ब्रेकर प्रयोग गरी ढुङ्गा फुटाउने कामसमेत भइरहेको छ ।

त्यस्तै, त्रिशूली–३ ‘बी’ जलविद्युत् आयोजनामा विदेशी विज्ञसहितको टोली परिचालन गरिएको छ । टोलीले सुरुङमा प्रवेश गर्ने द्वार पहिचान गरी एक्स्काभेटरको सहायताले खन्ने काम गरिरहेको छ ।

यसअघि २७९ जनाको जीवित उद्धार

बाढीपछि तत्काल सञ्चालन गरिएको खोज तथा उद्धार अभियानका क्रममा विभिन्न जलविद्युत् आयोजना क्षेत्रबाट २७९ जनाको जीवित उद्धार गरिएको नेपाली सेनाले जनाएको छ ।

उद्धार गरिएकामध्ये रसुवागढी जलविद्युत् आयोजनाबाट दुई जना, अपर त्रिशूली–१ बाट ३३ जना, अपर त्रिशूली–३ ‘ए’ बाट २२१ जना, अपर त्रिशूली–३ ‘बी’ बाट दुई जना, मैलुङबाट नौ जना, नुवाकोट सौर्य विद्युत् आयोजनाबाट चार जना, त्रिशूली जलविद्युत् आयोजनाबाट तीन जना र देवघाट जलविद्युत् आयोजनाबाट पाँच जना रहेका छन् ।

तर, बाढीबाट प्रभावित आयोजनाहरूमा अझै पनि सम्पर्कविहीन तथा फसेका व्यक्तिको खोजी चुनौतीपूर्ण बनेको छ ।

९ हजारभन्दा बढी सैनिक परिचालन

बाढी तथा पहिरोबाट प्रभावित क्षेत्रमा नेपाली सेनाले ठूलो संख्यामा जनशक्ति परिचालन गरेको छ ।

सेनाका अनुसार रसुवाको टिमुरेदेखि नुवाकोट, धादिङ, चितवन हुँदै पूर्वी नवलपरासीसम्मका प्रभावित क्षेत्रमा ९ हजार २०० भन्दा बढी सैनिक प्रत्यक्ष रूपमा खटिएका छन् ।

सैनिक टोलीले जङ्गल, डाँडा, खोला तथा बस्ती क्षेत्रमा पैदल गस्ती गरी स्थानीयको अवस्थाबारे जानकारी लिने, उद्धार आवश्यकताको मूल्याङ्कन गर्ने तथा जोखिममा परेकाको खोजी गर्ने काम गरिरहेको छ ।

त्यस्तै, घाइते तथा प्रभावितको खोज तथा उद्धार, शव व्यवस्थापनमा सहयोग, अवरुद्ध सडक सञ्चालन र आपत्कालीन उपचारलगायतका कामसमेत सेनाले समन्वयमा गरिरहेको जनाएको छ ।

बाढी प्रभावित क्षेत्रमा निःसंक्रमण अभियान

बाढीपछि प्रभावित क्षेत्रमा संक्रमण फैलिन नदिन नेपाली सेनाले निःसंक्रमण अभियानसमेत सञ्चालन गरिरहेको छ ।

सेनाका अनुसार धुन्चे बजार, श्री नं. १ सैन्य तालिम केन्द्र, त्रिशूली, देवघाट, पृथ्वीचन्द्र अस्पताल परासीस्थित शव सङ्कलन केन्द्र तथा सुनवल नगरपालिका–४ स्थित मूलपानी सामुदायिक वनमा निःसंक्रमण गरिएको छ ।

बाढीबाट प्रभावित अन्य क्षेत्रमा पनि स्थानीय तहसँगको समन्वयमा निःसंक्रमण तथा सरसफाइको काम अघि बढाइने सेनाले जनाएको छ ।

यसैबीच, सुरुङभित्र फसेका तथा सम्पर्कविहीन व्यक्तिको खोज तथा उद्धारलाई प्राथमिकतामा राख्दै विभिन्न आयोजनामा प्राविधिक तथा उद्धार टोलीको परिचालन जारी राखिएको छ । जोखिमपूर्ण भूमिगत संरचनामा पानी, हिलो, ढुङ्गा तथा अन्य अवरोधका कारण उद्धार कार्य चुनौतीपूर्ण बनेको छ ।

Originally published on abcnews.com.np.