काठमाडौं। भोटेकोशी नदीमा आएको विनाशकारी बाढीपछि रसुवाको गोसाइँकुण्ड गाउँपालिका–२ टिमुरे सुनसान बनेको छ । बाढीले बस्ती तथा सडक संरचना बगाएपछि सञ्चार र यातायात सम्पर्क विच्छेद हुँदा प्रभावित क्षेत्रमा बेपत्ताको खोजी तथा उद्धार कार्य चुनौतीपूर्ण बनेको छ ।

बाढीपछि टिमुरे क्षेत्रमा मात्रै २१ सयभन्दा बढी व्यक्ति सम्पर्कविहीन रहेको प्रारम्भिक विवरण छ । स्थानीय बासिन्दासँगै सुरक्षाकर्मी, नेपाली तथा विदेशी पर्यटकसमेत सम्पर्कविहीन रहेको जनाइएको छ ।

सम्पर्कविहीन व्यक्तिको खोजी तथा उद्धारका लागि अहिले प्रभावित क्षेत्रमा सशस्त्र प्रहरीको विशेष टोली परिचालित छ । अन्य निकाय तथा स्थानीयको पहुँचसमेत कठिन बनेको अवस्थामा सशस्त्र प्रहरीले सीमित स्रोतसाधन र प्रतिकूल भौगोलिक अवस्थाबीच भदौ १० गतेदेखि निरन्तर खोजी गरिरहेको जनाएको छ ।

सशस्त्र प्रहरीका अनुसार हालसम्म टिमुरे क्षेत्रमा ९७ जनाको शव फेला पारिएको छ ।

खोजी तथा उद्धारका क्रममा सशस्त्र प्रहरीले ड्रोन क्यामेरा, केनाइन डग, गोताखोर, रोप रेस्क्यु तथा विपद् व्यवस्थापनमा तालिमप्राप्त जनशक्तिको प्रयोग गरिरहेको छ ।

हाल टिमुरे क्षेत्रमा सशस्त्र प्रहरी नायब उपरीक्षक प्रदीप राईको कमान्डमा ३० जनाभन्दा बढी सुरक्षाकर्मीको विशेष टोली परिचालित छ । नेपाल एपीएफ अस्पतालबाट प्राविधिक सशस्त्र प्रहरी निरीक्षक डा. सुरेन्द्र भट्टराई र डा. अनिल जोशीसमेत उद्धार टोलीमा खटिएका छन् ।

बाढी र पहिरोले स्याफ्रुबेँसीदेखि रसुवागढीसम्मको सडकखण्डसहित मुख्य मार्गमा रहेका करिब ४१ भन्दा बढी पुल बगाएको सशस्त्र प्रहरीले जनाएको छ । सडक तथा सञ्चार संरचना क्षतिग्रस्त भएपछि प्रभावित क्षेत्रमा आवश्यक उपकरण, विद्युत् तथा अन्य स्रोतसाधन पुर्‍याउनसमेत कठिन भएको छ ।

विद्युत् आपूर्ति अवरुद्ध हुँदा सञ्चार प्रणालीमा समेत समस्या आएको छ । वैकल्पिक मार्गको अभावमा आवश्यक उपकरण तथा स्रोतसाधन प्रभावित क्षेत्रमा पुर्‍याउन कठिन भइरहेको सशस्त्र प्रहरी नायब उपरीक्षक राईले बताएका छन् ।

बाढीमा सशस्त्र प्रहरीका आफ्नै ९ जना कर्मचारीसमेत बेपत्ता भएका छन् । उनीहरूको खोजीका लागि अन्य क्षेत्रबाट थप जनशक्ति परिचालन गरिएको छ ।

घाइते तथा सकुशल उद्धार गरिएका नागरिकलाई सुरक्षित रूपमा रसुवाको धुन्चेस्थित होल्डिङ सेन्टरमा पठाउने व्यवस्था गरिएको छ ।

६० घण्टापछि माटोमुनिबाट जीवितै उद्धार

टिमुरेमा खोजी तथा उद्धारमा खटिएको सशस्त्र प्रहरी टोलीले भदौ १२ गते साँझ माटोमुनि पुरिएकी ६ वर्षीया बालिकालाई करिब ६० घण्टापछि जीवितै उद्धार गरेको थियो ।

बाढी आएको करिब ६० घण्टापछि माटोमुनिबाट बालिका रोएको आवाज सुनेपछि सुरक्षाकर्मीले तत्काल उत्खनन सुरु गरेका थिए । लामो प्रयासपछि बालिकालाई जीवितै बाहिर निकाल्न टोली सफल भएको थियो ।

सशस्त्र प्रहरी नायब महानिरीक्षक तथा प्रवक्ता नेत्रबहादुर कार्कीका अनुसार उद्धारपछि बालिकालाई बोर्डर आउटपोस्ट टिमुरेमा ल्याएर प्राथमिक उपचार गरिएको थियो । स्वास्थ्य अवस्था कमजोर हुँदै गएपछि उनलाई हेलिकप्टरमार्फत काठमाडौं पठाइएको थियो ।

भोटेकोशीको बाढीले टिमुरेलाई बाँकी क्षेत्रबाट लगभग अलग पारेको अवस्थामा सशस्त्र प्रहरीको टोली अहिले पनि बेपत्ताको खोजी, शव व्यवस्थापन तथा उद्धार कार्यमा निरन्तर खटिरहेको छ ।

सडक छैन, सञ्चार छैन, विद्युत् छैन—तर टिमुरेमा बेपत्ताको खोजी भने रोकिएको छैन ।

Originally published on abcnews.com.np.