काठमाडौं । धादिङको बेनीघाट रोराङ गाउँपालिकाका किसान ज्यानको जोखिम मोलेर कृषि उपज बजार पुर्‍याउन बाध्य भएका छन्।

पृथ्वी राजमार्गअन्तर्गत कृष्णभीरमा खसेको पहिरोका कारण सडक अवरुद्ध भएपछि किसानले ढुंगा, लेदो र पहिरोको जोखिमबीच तरकारी बोकेरै बेनीघाट बजारसम्म पुग्नुपर्ने अवस्था आएको हो।

कृष्णभीर क्षेत्रमा निरन्तर पहिरो खसिरहेका कारण सडक यात्रा जोखिमपूर्ण बनेको छ। तर, उत्पादन बजारसम्म पुर्‍याउन नसके लगानी नै डुब्ने भएपछि किसान जोखिम मोलेरै कृषि उपज बिक्रीका लागि लैजान बाध्य छन्।

सडक अवरोधका कारण कृषि उपजको बजारीकरण प्रभावित हुँदा किसानको आम्दानीमा समेत प्रत्यक्ष असर परेको छ।

भदौ १० गते त्रिशूली नदीमा आएको भीषण बाढीपछि कृष्णभीर, परेवाभीरलगायतका तटीय क्षेत्रमा सडक अवरुद्ध हुँदा स्थानीयको आवतजावतसँगै कृषि उपजको ढुवानीसमेत प्रभावित भएको छ।

Originally published on abcnews.com.np.