काठमाडौ, १७ चैत्र ।  नेकपा एमालेका स्थायी कमिटी सदस्य सुरेन्द्र पाण्डेले अध्यक्ष केपी शर्मा ओलीले सोधेको स्पष्टीकरणको जवाफ दिनु भएको छ । शत्रुलाई पठाएको जस्तो पत्रको जवाफ दिन आवश्यक नरहेको भएता पनि आफूलाई लगाइएको आरोप कति मिथ्या छन् भनेर पत्रको जवाफ पठाएको उनले उल्लेख गर्नुभएको छ ।

‘स्पष्टीकरणसहितको लिखित जवाफ’को मागले ‘कंगारू अदालत’को अभ्यास भएको उनको भनाइ छ। यसका साथै, ओली गुटले गरेको भनिएको निर्णयहरू पार्टी विधानविपरीत भएको पत्रमा जवाफ दिनु भएको छ ।

उहाले भन्नुभएको छ –‘तपाईंले मलाई आरोपको रूपमा विभिन्न प्रश्नहरू तेर्स्याउनु भएको छ। प्रश्नहरू हेर्दा तपाईंमाथि नै धेरै प्रश्नहरू सोझिएका छन्। तपाईंले मलाई प्रचण्डको मतियार भन्ने लगाउनु भएको आरोप हाँस्यास्पद लाग्यो। किनकि ०७४ असोज १५ गते तपाईं एक्लैले तत्कालीन नेकपा एमाले र नेकपा माओवादी केन्द्रबीच चुनावी तालमेल गर्ने र दुई पार्टीबीच सिटको बाँडफाँट गर्ने गोप्य सहमति गर्नु भयो। ०७५ जेठ ३ गते भएको पार्टी एकताको समयमा आलोपालो अध्यक्षता र प्रधानमन्त्री आधाआधी बाँड्ने प्रचण्डसँगको सहमति पनि गोप्य रूपमा तपाईंले नै गर्नु भएको थियो। अब तपाईं भन्नुस् प्रचण्डको मतियार तपाईं हो कि अरू कोही ?’