काठमाडौं २७ असार ।
एएफसी अन्डर २३ च्याम्पियनसिप छनोटको तयारीमा रहेका नेपाल यू २३ र बंगलादेशको अन्डर २३ बीच आजमैत्रीपूर्ण फुटबल खेल हुदैछ ।
खेलअघि सोमबार भएको प्रिम्याच कन्फ्रेन्समा दुवै टिमका कोच र कप्तानले खेलका लागि तयार रहेको बताएका छन्। नेपाल यू–२३ का कोच राजुकाजी शाक्यले छोटो समयमै मैत्रीपूर्ण खेल खेल्नुले पनि तयार रहेको बताउनुभयो ।

बंगलादेशविरुद्धको खेल र युएईमा हुने छनोट प्रतियोगिताको लागि शाक्यले आइतबार मात्रै विमल घर्तीमगरको कप्तानीमा २३ सदस्यीय अन्तिम टोली घोषणा गर्नुभएको थियो । त्यस्तै बंगलादेशका अष्ट्रेलियाली कोच आन्द्रे ओर्डले नेपालविरुद्धको खेल कठिन हुने बताउनुभयो ।

नेपालले आगामी शनिबार आयोजक युएईसँग खेल्दै छनोटको यात्रा सुरु गर्नेछ । नेपाल र युएईसँगै समूह डी मा उज्वेकिस्तान र लेवनान छन्। यस्तै आगामी सोमबार उज्वेकिस्तान तथा बुधबार लेवनानसँग नेपालले खेल्नेछ। यता बंगलादेश रहेको समूह ई मा प्यालेस्टाइन, जोर्डन र ताजिकिस्तान छन् ।