ओखलढुङ्गा । चम्पादेवी गाउँपालिका–१ र २ मा पर्ने पलापु गाउँको सडकको अवस्था जीर्ण बनेको छ। सडक ठाउँठाउँमा बिग्रिएर माकुराको जालोजस्तै देखिने अवस्थामा पुगेपछि स्थानीयवासीलाई आवतजावत तथा मालसामान ओसारपसारमा समस्या भएको छ।

जिल्लाका दुर्गम ग्रामीण क्षेत्रमा पछिल्लो समय सडक सञ्जाल विस्तार भए पनि पलापु गाउँको सडकको अवस्था भने सुधार हुन सकेको छैन। सडकमा खाल्डाखुल्डी तथा असहज भू–भागका कारण स्थानीयले दैनिक आवतजावतमा समस्या भोग्दै आएका छन्।

विशेषगरी वर्षायाममा सडकको अवस्था थप बिग्रिने गरेको स्थानीयवासीको भनाइ छ। वर्षाका कारण सडक हिलाम्मे हुँदा यातायात सेवा नै प्रभावित हुने र गाउँमा आवश्यक सामग्री ढुवानी गर्नसमेत कठिनाइ हुने गरेको उनीहरू बताउँछन्।

सडक सुधारको माग

स्थानीयवासीले सडक सुधारका लागि पटकपटक सम्बन्धित निकायसँग आग्रह गरे पनि समस्या समाधान हुन नसकेको गुनासो गरेका छन्। उनीहरूले तत्काल सडक मर्मत तथा स्तरोन्नतिको माग गरेका छन्।

गाउँपालिकाले आगामी योजनामा सडक सुधारका लागि बजेट विनियोजन गर्ने आश्वासन दिएको जनाइएको छ। तर, स्थानीयवासीले वर्षायाममा थप समस्या आउनुअघि नै सडक सुधारको काम सुरु गर्न आग्रह गरेका छन्।

पत्रकार नवराज कार्कीले खिचेका तस्बिरमा पलापु गाउँको सडकको जीर्ण अवस्था देखिएको छ।

Originally published on abcnews.com.np.