काठमाडौं । डा. धवलशम्शेर राणाको नेतृत्वमा गठन भएको जय नेपाल पार्टी आगामी साउन २९ गते निर्वाचन आयोगमा विधिवत् दर्ता हुने भएको छ।

पार्टीका अध्यक्ष राणाले बुधबार सूचना जारी गर्दै दल दर्ताका लागि आवश्यक सम्पूर्ण तयारी पूरा भएको जनाएका छन्। उनका अनुसार साउन २६ गते बसेको कार्यदलको निर्णयअनुसार साउन २९ गते पार्टी दर्ता गरिनेछ।

यसअघि डा. राणा र मेडिकल व्यवसायी दुर्गा प्रसाईंले संयुक्त रूपमा जय नेपाल पार्टी गठनको घोषणा गरेका थिए। पार्टी गठन समारोहमा प्रसाईंलाई सर्वोच्च नेताको जिम्मेवारी दिइएको थियो।

यसअघि उनीहरूले साउन २८ गते निर्वाचन आयोगमा पार्टी दर्ता गर्ने जानकारी दिएका थिए। तर, पछिल्लो सूचनाअनुसार दर्ताको मिति एक दिन पछि सारिएको हो।

अध्यक्ष राणाले पार्टीका नेता, कार्यकर्ता तथा शुभेच्छुकलाई साउन २९ गते मध्याह्न १२ः१५ बजे निर्वाचन आयोगको कार्यालयमा उपस्थित हुन आह्वान गरेका छन्।

पार्टीले आगामी निर्वाचनमा सहभागी हुने उद्देश्यसहित संगठन विस्तार र कानुनी प्रक्रिया अघि बढाएको जनाएको छ।

Originally published on abcnews.com.np.