पोखरा । निजी अस्पतालमा कार्यरत इन्टर्न चिकित्सकको तलब तथा भत्ता रोक्ने निर्णय भएपछि चिकित्सकहरू आन्दोलनमा उत्रिएका छन्। पोखराको पृथ्वीचोकस्थित गण्डकी मेडिकल कलेजका इन्टर्न चिकित्सकले अस्पताल प्रशासनले तलब रोक्का गरेपछि बुधबार अस्पताल परिसरमा विरोध प्रदर्शन गरेका हुन्।

आन्दोलनरत चिकित्सकले अस्पतालले श्रम शोषण गरेको र चिकित्सकीय पेसाको मर्यादाविपरीत काम गरेको आरोप लगाएका छन्। इन्टर्न डाक्टर प्रविण ओझाले आफूहरूले यसअघि मासिक १२ हजार ५ सय रुपैयाँमा काम गर्दै आएको बताए।

एसोसिएसन अफ प्राइभेट मेडिकल एन्ड डेन्टल कलेज अफ नेपाल (अफिन) ले इन्टर्न चिकित्सकलाई थप भत्ता तथा आर्थिक सुविधा उपलब्ध नगराउन सदस्य कलेजलाई आग्रह गरेपछि आफूहरू समस्यामा परेको उनले बताए।

“हामी १२ हजार पाँच सयमा पनि काम गर्दै आएका छौँ, अहिले एसोसिएसनले इन्टर्नलाई तलबबिना एक वर्ष काम गराउने भन्ने सुनियो,” उनले भने, “प्रशासनले यो एसोसिएसनले गरेको हो, हामीले होइन भनेपछि हामी आन्दोलनमा उत्रिएका हौँ।”

माग पूरा नभएसम्म आन्दोलन जारी राख्ने चिकित्सकले बताएका छन्। आन्दोलनका क्रममा कुनै विद्यार्थीलाई एक्लै बोलाएर दबाब दिने वा धम्की दिने काम स्वीकार्य नहुने उनीहरूको चेतावनी छ।

लामो समय काम, पारिश्रमिक घटाउने तयारी

इन्टर्न डाक्टर आकृति सापकोटाले आफूहरूले ३६ घण्टासम्म लगातार काम गर्नुपरेको बताइन्। बिरामीको उपचारमा खटिँदा आफ्नो स्वास्थ्यसमेत बेवास्ता गर्नुपरेको अवस्थामा पाउँदै आएको पारिश्रमिकसमेत रोक्ने निर्णय अन्यायपूर्ण भएको उनको भनाइ छ।

“आफ्नो हेल्थसम्म नहेरी पेसेन्टका लागि खटिन्छौँ, अहिलेसम्म १२ हजारमा काम गरेका थियौँ, अब त्यो पनि नदिई श्रम शोषण गर्ने तयारी देखियो,” उनले भनिन्।

गण्डकी मेडिकल कलेजमा हाल ७५ जना इन्टर्न चिकित्सक कार्यरत छन्।

अफिनको यस्तो छ निर्णय

एसोसिएसन अफ प्राइभेट मेडिकल एन्ड डेन्टल कलेज अफ नेपालले हालै पिजी रेजिडेन्ट चिकित्सक तथा एमबीबीएस/बीडीएस इन्टर्नलाई थप भत्ता तथा आर्थिक सुविधा उपलब्ध गराउन नसकिने जनाएको छ।

अफिन अध्यक्ष प्राडा ज्ञानेन्द्र मान सिंह कार्कीले जारी गरेको विज्ञप्तिमा सरकारले निजी मेडिकल कलेजसँग पर्याप्त संवाद र सहमति नगरी आर्थिक दायित्व थपेको आरोप लगाइएको छ।

सोही कारण अर्को निर्णय नभएसम्म सदस्य कलेजलाई पिजी रेजिडेन्ट तथा इन्टर्न चिकित्सकलाई थप भत्ता वा भुक्तानी नगर्न आग्रह गरिएको छ। यस निर्णयपछि इन्टर्न चिकित्सकले भने आफूहरूले गर्दै आएको कामको उचित पारिश्रमिक पाउनुपर्ने माग अघि सारेका छन्।

Originally published on abcnews.com.np.