काठमाडौँ । ललिता निवास जग्गा प्रकरणमा पूर्वप्रधानमन्त्रीद्वय माधवकुमार नेपाल र बाबुराम भट्टराईलाई समेत प्रतिवादी बनाएर मुद्दा चलाउन माग गरिएको रिटमा आज सुनुवाइ हुँदैछ। वरिष्ठ अधिवक्ता बालकृष्ण न्यौपानेले २०७६ सालमा दायर गरेको उक्त रिट प्रधानन्यायाधीश डा. मनोजकुमार शर्मासहितको पूर्ण इजलासमा पेशी तोकिएको हो।

प्रधानन्यायाधीश शर्माको नेतृत्वमा रहेको इजलासमा न्यायाधीशद्वय विनोद शर्मा र सुनिलकुमार पोखरेल पनि छन्।

अख्तियार दुरुपयोग अनुसन्धान आयोगले २०७६ माघ २२ गते ललिता निवास जग्गा प्रकरणमा १७५ जनालाई प्रतिवादी बनाउँदै विशेष अदालतमा मुद्दा दायर गरेको थियो। तर तत्कालीन प्रधानमन्त्रीद्वय माधवकुमार नेपाल र बाबुराम भट्टराई तथा तत्कालीन मुख्यसचिव लिलामणि पौडेललाई प्रतिवादी नबनाइएको भन्दै न्यौपानेले त्यसको केही दिनपछि अर्थात् माघ २९ गते सर्वोच्च अदालतमा रिट दायर गरेका थिए।

सात वर्षदेखि विचाराधीन

रिट दायर भएको करिब सात वर्ष बितिसक्दा पनि यसको अन्तिम टुंगो लाग्न सकेको छैन। निवेदक न्यौपानेले अख्तियारले छानीछानी व्यक्तिलाई उन्मुक्ति दिएको दाबी गर्दै आएका छन्।

सरकारी जग्गा व्यक्तिको नाममा लैजान सहयोग पुग्ने गरी तत्कालीन प्रधानमन्त्रीबाट नीतिगत निर्णय भएको दाबीसमेत रिटमा गरिएको छ।

के माग गरिएको छ?

निवेदकले ललिता निवास जग्गा प्रकरणमा पूर्वप्रधानमन्त्रीद्वय नेपाल र भट्टराई तथा पूर्वमुख्यसचिव पौडेललाई पनि प्रतिवादी कायम गरी मुद्दा चलाउन अख्तियारलाई आदेश दिन माग गरेका छन्।

आजको सुनुवाइपछि यो रिटको लामो समयदेखि जारी कानुनी प्रक्रियाले कुन दिशा लिन्छ भन्ने चासोका साथ हेरिएको छ।

Originally published on abcnews.com.np.