म्याग्दी । रघुगंगा गाउँपालिका–२ स्थित सिरुवारी क्षेत्रमा खस्ने पहिरोका कारण चीन र भारतलाई जोड्ने कालीगण्डकी करिडोरअन्तर्गतको बेनी–जोमसोम–कोरला सडकखण्डमा बर्खायाममा नियमित यातायात सञ्चालन गर्न कठिनाइ भएको छ।

कालीगण्डकी नदी किनारको पाखोमा सामान्य वर्षा हुँदा समेत पहिरो खस्ने गरेको स्थानीयवासीले बताएका छन्। पहिरोका कारण सडक पटक–पटक अवरुद्ध हुँदा यात्रु तथा मालवाहक सवारीसाधन जोखिम मोलेर यात्रा गर्न बाध्य छन्।

नदी कटानले कमजोर पाखो

स्थानीयवासीका अनुसार कालीगण्डकी नदीको निरन्तर कटानका कारण सिरुवारी क्षेत्रको पाखो कमजोर बनेको छ। यही कारण ठूलो वर्षा नहुँदा पनि माटो, ढुंगा तथा गेग्रान खस्ने गरेको हो।

बर्खायाममा यो क्षेत्र पहिरोको उच्च जोखिममा रहने भएकाले सडक अवरुद्ध हुने समस्या हरेक वर्ष दोहोरिने गरेको स्थानीयको भनाइ छ।

महत्वपूर्ण व्यापारिक मार्ग प्रभावित

बेनी–जोमसोम–कोरला सडकखण्ड उत्तर–दक्षिण जोड्ने महत्वपूर्ण सडक भएकाले यहाँ हुने अवरोधले यात्रु आवागमनसँगै मालसामान ढुवानीमा समेत प्रत्यक्ष असर पार्ने गरेको छ।

सिरुवारीमा पहिरो खस्दा केही समय सवारीसाधन रोकिँदा यात्रु तथा चालक समस्यामा पर्ने गरेका छन्। सडक खुलाउन तत्काल पहिरो हटाउने गरिए पनि वर्षा जारी रहँदा समस्या पुनः दोहोरिने गरेको बताइएको छ।

स्थानीयवासीले पहिरो नियन्त्रणका लागि तत्कालीन रूपमा पहिरो हटाउनेभन्दा दीर्घकालीन भू–संरक्षण र सडक सुरक्षाका उपाय अपनाउनुपर्ने माग गरेका छन्। समयमै स्थायी समाधान खोज्न नसके आगामी दिनमा सडक अवरोधसँगै जनधनको जोखिमसमेत बढ्न सक्ने उनीहरूको चिन्ता छ।

Originally published on abcnews.com.np.