काठमाडौं । जल तथा मौसम विज्ञान विभागअन्तर्गतको मौसम पूर्वानुमान महाशाखाले आज देशभर सामान्यदेखि पूर्ण बदली रही विभिन्न स्थानमा वर्षा र हिमपातको सम्भावना रहेको जनाएको छ।

महाशाखाले बिहान ८ बजे जारी गरेको बुलेटिनअनुसार हाल मधेस प्रदेशसहित कोसी, बागमती र गण्डकी प्रदेशमा सामान्यतया बदली छ। लुम्बिनी, कर्णाली र सुदूरपश्चिम प्रदेशमा भने आंशिक बदलीदेखि मौसम मुख्यतया सफा रहेको छ।

दिउँसो देशभर सामान्यतया बदली रहनेछ। कोसी, बागमती, गण्डकी र लुम्बिनी प्रदेशका हिमाली तथा पहाडी भूभागका धेरै स्थानमा तथा कर्णाली र सुदूरपश्चिमका हिमाली तथा पहाडी भूभागका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ।

मधेस, बागमती, गण्डकी र लुम्बिनीका तराई भूभागका केही स्थान तथा सुदूरपश्चिमको तराई भूभागका थोरै स्थानमा पनि मेघगर्जन र चट्याङसहित मध्यम वर्षाको सम्भावना रहेको छ।

महाशाखाका अनुसार गण्डकीका हिमाली तथा पहाडी भूभागका थोरै स्थान, बागमती र गण्डकीका तराई भूभाग तथा कोसी र बागमतीका हिमाली तथा पहाडी भूभाग र लुम्बिनीका पहाडी भूभागका एक–दुई स्थानमा भारी वर्षाको सम्भावना छ।

राति पनि वर्षाको सम्भावना

राति देशभर सामान्यतया बदली रहनेछ। बागमती, गण्डकी र लुम्बिनीका हिमाली तथा पहाडी भूभागका धेरै स्थानमा तथा कोसी, कर्णाली र सुदूरपश्चिमका हिमाली तथा पहाडी भूभागका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ।

तराईका विभिन्न भूभागमा पनि मेघगर्जन र चट्याङसहित मध्यम वर्षाको सम्भावना रहेको महाशाखाले जनाएको छ।

राति बागमती, गण्डकी र लुम्बिनीका हिमाली तथा पहाडी भूभागका थोरै स्थानसहित विभिन्न प्रदेशका केही स्थानमा भारी वर्षाको सम्भावना छ। गण्डकी र लुम्बिनीका हिमाली तथा पहाडी भूभागका एक–दुई स्थानमा धेरै भारी वर्षाको समेत सम्भावना रहेको महाशाखाले जनाएको छ।

काठमाडौंमा दिउँसोपछि पानी पर्ने

काठमाडौं उपत्यकामा पनि आज वर्षाको सम्भावना रहेको छ। मौसमविद् मीनकुमार अर्यालका अनुसार उपत्यकामा दिउँसो २/३ बजेपछि मध्यमसम्म वर्षा हुन सक्नेछ।

त्यसअघि भने काठमाडौंमा घाम लाग्ने र बादल लाग्ने क्रम चल्ने सम्भावना रहेको उनले बताए।

वर्षाको मापदण्ड

मौसमविद्का अनुसार २४ घण्टामा १० मिलिमिटरभन्दा कम वर्षा भए हल्का, १० देखि ५० मिलिमिटरसम्म भए मध्यम र ५० देखि १०० मिलिमिटरसम्म भए भारी वर्षा मानिन्छ।

१०० देखि २०० मिलिमिटरसम्म वर्षा भए धेरै भारी र २०० मिलिमिटरभन्दा बढी वर्षा भए अति भारी वर्षा मानिन्छ।

त्यस्तै, १० प्रतिशतभन्दा कम भूभागमा वर्षा हुने सम्भावनालाई ‘एक–दुई स्थान’, १० देखि ३० प्रतिशतलाई ‘थोरै स्थान’, ३० देखि ५० प्रतिशतलाई ‘केही स्थान’, ५० देखि ८० प्रतिशतलाई ‘धेरै स्थान’ र ८० प्रतिशतभन्दा बढी भूभागमा वर्षा हुने सम्भावनालाई ‘अधिकांश स्थान’ भनिने मौसमविद्ले बताएका छन्।

Originally published on abcnews.com.np.