द टेलिग्राफका अनुसार ह्यारी–मेघनले केही साताभित्र क्यालिफोर्निया छाडेर लन्डनबाहिरको निजी तथा गैरशाही निवासमा बस्ने योजना बनाएका छन्। उनीहरूले नयाँ घरसमेत छनोट गरिसकेको बताइएको छ।

बीबीसीलगायत सञ्चारमाध्यमका अनुसार उनीहरूका ७ वर्षीय छोरा आर्ची र ५ वर्षीया छोरी लिलिबेटलाई सेप्टेम्बरमा सुरु हुने शैक्षिक सत्रका लागि बेलायती विद्यालयमा भर्ना गरिसकिएको छ।

ह्यारी र मेघनले सन् २०२० मा राजपरिवारको आधिकारिक जिम्मेवारी त्यागेर अमेरिका बसाइँ सरेका थिए। त्यसपछि ह्यारीको संस्मरण ‘स्पेयर’ र अमेरिकी टेलिभिजन प्रस्तोता ओप्रा विन्फ्रेसँगको अन्तर्वार्ताले शाही परिवारसँगको उनीहरूको सम्बन्ध थप तनावपूर्ण बनेको थियो।

राजा चार्ल्सलाई जानकारी

प्रेस एसोसिएसनका अनुसार ह्यारी दम्पतीले बेलायत फर्किएर बस्ने योजनाबारे राजा चार्ल्स तृतीयलाई जानकारी गराइसकेका छन्।

राजाले परिवारका सदस्यसँग भेटघाट गर्ने अवसरलाई स्वागत गर्ने भए पनि ह्यारी र मेघनको शाही हैसियतमा कुनै परिवर्तन नहुने बताइएको छ। उनीहरूले पुनः राजपरिवारको आधिकारिक जिम्मेवारी सम्हाल्ने सम्भावना पनि नरहेको जनाइएको छ।

यसअघि ह्यारीले बेलायतमा परिवारसहित फर्किँदा आफूले सुरक्षा महसुस नगरेको बताएका थिए। सरकारी खर्चमा उपलब्ध हुने प्रहरी सुरक्षासम्बन्धी कानुनी विवादमा पराजित भएपछि उनले परिवारलाई सुरक्षित रूपमा बेलायत ल्याउन कठिन रहेको बताएका थिए। यद्यपि गृह मन्त्रालयले सुरक्षा आवश्यकता मूल्याङ्कनका आधारमा उपयुक्त व्यवस्था गरिने जनाएको छ।

विलियमलाई जानकारी छ कि छैन ?

ह्यारी–मेघनको पछिल्लो बेलायत भ्रमण जुलाईको सुरुआतमा भएको थियो। त्यस क्रममा उनीहरूले राजा चार्ल्ससँग निजी भेट गरेका थिए।

राजा चार्ल्सलाई दुई वर्षअघि क्यान्सर भएको पत्ता लागेपछि उनी उपचाररत छन्। ह्यारीका दाजु तथा सिंहासनका उत्तराधिकारी राजकुमार विलियम र उनकी पत्नी क्याथरिनलाई दम्पतीको फर्किने योजनाबारे जानकारी दिइएको छ वा छैन भन्ने स्पष्ट भइसकेको छैन।

ह्यारी र विलियमबीच लामो समयदेखि सम्बन्धमा दूरी रहेको बताइन्छ।

अमेरिकापछि बेलायतमा पुनरागमन

राजपरिवारसम्बन्धी टिप्पणीकार रिचर्ड फिट्जविलियम्सले ह्यारी–मेघनको बेलायत फर्किने योजनालाई ‘असाधारण विकास’ भनेका छन्। उनले दम्पतीले अमेरिकामा अपेक्षित सफलता हासिल गर्न नसकेको टिप्पणी गरेका छन्।

सन् २०२० मा नेटफ्लिक्ससँग करिब १० करोड अमेरिकी डलरको सम्झौता गरे पनि उनीहरूका केही परियोजनाले अपेक्षाअनुसार दर्शक आकर्षित गर्न नसकेको बताइएको छ।

द सनका अनुसार ह्यारी–मेघनले क्यालिफोर्नियाको मोन्टेसिटोस्थित घर र पोर्चुगलको घर भने कायम राख्नेछन्।

डायनाको जीवनबारे पुस्तक

यसैबीच ह्यारीकी आमा राजकुमारी डायनाका भाइ चार्ल्स स्पेन्सरले डायनाको जीवनबारे ‘स्वान सङः डायना, माई सिस्टर’ नामक पुस्तक प्रकाशन गर्ने घोषणा गरेका छन्।

पुस्तक सेप्टेम्बर २२ मा १२ भाषामा प्रकाशित हुने बताइएको छ। जुलाईको सुरुआतमा ह्यारी, मेघन र उनीहरूका सन्तानले मध्य इङ्ल्यान्डस्थित अल्थर्पमा रहेको स्पेन्सर परिवारको पैतृक घर पुगेर डायनाको समाधिस्थलमा श्रद्धाञ्जलि अर्पण गरेका थिए।