काठमाडौं । विदेशमा रहेका नेपाली नागरिकले अब आफू रहेको मुलुकमै रहेको नेपाली दूतावास वा नियोगबाट नेपाल सरकारले जारी गरेको सवारी चालक अनुमतिपत्र (लाइसेन्स) प्रमाणीकरण गराउन सक्ने भएका छन्।

परराष्ट्र मन्त्रालयअन्तर्गतको कन्सुलर सेवा विभागले सूचना जारी गर्दै विदेशमा रहेका नेपाली नागरिकका लागि यो व्यवस्था गरिएको जानकारी दिएको हो।

विभागका अनुसार नेपाल सरकारबाट जारी भएका सवारी चालक अनुमतिपत्रको प्रमाणीकरण सेवा सम्बन्धित देशमा रहेका नेपाली दूतावास तथा कूटनीतिक नियोगबाट उपलब्ध हुनेछ।

“विदेशमा रहेका नेपाली नागरिकहरूले नेपाल सरकारबाट जारी भएको सवारी चालक अनुमतिपत्रको प्रमाणीकरण सेवा सम्बन्धित मुलुकमा रहेको नेपाली नियोगबाट लिन सकिने व्यहोरा सम्बन्धित सबैको जानकारीका लागि सूचित गरिन्छ,” विभागले सूचनामार्फत जनाएको छ।

यो व्यवस्थासँगै लाइसेन्स प्रमाणीकरणका लागि विदेशमा रहेका नेपालीले नेपाल नै फर्किनुपर्ने झन्झट कम हुने अपेक्षा गरिएको छ। विशेषगरी विदेशमा सवारी चलाउन, स्थानीय प्रक्रिया पूरा गर्न वा अन्य आधिकारिक प्रयोजनका लागि नेपाली लाइसेन्सको प्रमाणीकरण आवश्यक पर्ने नेपाली नागरिकलाई यसबाट सहजता हुने भएको छ।

Originally published on abcnews.com.np.