मुम्बई । महात्मा गान्धीद्वारा लिखित दुर्लभ हस्तलिखित नोटहरूको संग्रह मुम्बईमा भएको लिलामीमा १६.२ करोड भारतीय रुपैयाँमा बिक्री भएको छ।

स्वतन्त्रता सेनानी तथा गान्धीका निकट सहयोगी आनन्द टी. हिंगोरानीको परिवारले सुरक्षित राखेको उक्त संग्रहमा गान्धीका ६८८ वटा हस्तलिखित सन्देश छन्। सन् १९४४ देखि १९४६ बीच लेखिएका ती सन्देशमा सत्य, अहिंसा र आत्मसंयमजस्ता विषयमा गान्धीका विचार समेटिएका छन्।

लिलामी कम्पनी स्याफ्रनआर्टका अनुसार यो बिक्री भारतीय ऐतिहासिक दस्तावेजको लिलामीमा हालसम्मकै उच्च मूल्यको रेकर्ड हो।

व्यक्तिगत जीवनका झलक

यी हस्तलिखित सन्देशमा गान्धीको राजनीतिक नेतृत्वभन्दा उनको व्यक्तिगत र भावनात्मक पक्ष झल्किन्छ। हिंगोरानीकी पत्नी विद्याको निधनपछि गान्धीले करिब दुई वर्षसम्म उनलाई पत्र तथा सन्देशमार्फत सान्त्वना, सल्लाह र प्रोत्साहन दिएका थिए।

ती सन्देशलाई पछि ‘अ थट फर द डे’ शीर्षकको पुस्तकमा समेत समेटिएको थियो। गान्धीका यी दुर्लभ लिखतले उनको व्यक्तिगत सोच, मानवीय संवेदना र जीवनदर्शन बुझ्न महत्वपूर्ण ऐतिहासिक सामग्रीका रूपमा महत्त्व राख्ने बताइएको छ।

Originally published on abcnews.com.np.