बागलुङ । सरकारले सरकारी कागजात घरमै पुर्‍याउने योजना अघि बढाएसँगै हुलाकमार्फत राहदानी वितरण सेवा प्रभावकारी बन्दै गएको छ । सेवा सुरु भएयता मनाङबाहेक गण्डकी प्रदेशका १० जिल्लामा १ हजार ७७८ थान राहदानी नागरिकको घरमै पुर्‍याइएको छ ।

गत चैत १३ गते बसेको मन्त्रिपरिषद् बैठकले सरकारी सेवा घरमै उपलब्ध गराउने उद्देश्यले हुलाक सेवालाई आधुनिकीकरण गरी सरकारी कुरियर सेवाका रूपमा विकास गर्ने निर्णय गरेको थियो । सोही योजनाअनुसार राहदानी घरघरमा पुर्‍याउने सेवा सुरु गरिएको हो ।

हुलाक निर्देशनालय पोखरा र अन्तर्गतका जिल्ला हुलाक कार्यालयहरूको वार्षिक समीक्षा गोष्ठीमा शुक्रबार प्रस्तुत तथ्याङ्कअनुसार सबैभन्दा धेरै तनहुँमा ५०५ र नवलपुरमा ५०० थान राहदानी वितरण गरिएको छ । गोरखामा ३३३, स्याङ्जामा १५०, बागलुङमा १०१, म्याग्दीमा ९७, लमजुङमा ६०, पर्वतमा १७, मुस्ताङमा ६ र कास्कीमा ९ थान राहदानी घरमै पुर्‍याइएको छ ।

मनाङमा भने जिल्ला प्रशासन कार्यालयबाट राहदानी वितरणका लागि प्राप्त नभएकाले सेवा सञ्चालन हुन नसकेको जिल्ला हुलाक कार्यालय मनाङका खरिदार श्यामलाल थारुले जानकारी दिए ।

बागलुङको बुर्तिबाङमा आयोजित गोष्ठीमा हुलाक निर्देशनालय पोखराका निर्देशक नेत्रप्रसाद पौडेलले हुलाकमार्फत सरकारी कागजात घरमै पुग्न थालेपछि नागरिकको हुलाकप्रतिको धारणा परिवर्तन हुन थालेको बताए ।

उनका अनुसार कास्कीमा प्रशासन कार्यालयमा पुगेर राहदानी लिन नागरिकलाई सहज भएकाले हुलाकमार्फत वितरणको संख्या कम देखिएको हो । तर, अन्य जिल्लामा हुलाकमार्फत घरमै सेवा पुग्न थालेपछि हुलाकप्रतिको नागरिकको विश्वास बढ्दै गएको उनले बताए ।

हुलाक सेवा विभागकी निर्देशक सपना कुमारी भट्टराईले सरकारले अब सिमकार्ड र विश्वविद्यालयका प्रमाणपत्रसमेत हुलाकमार्फत घरमै पुर्‍याउने तयारी गरिरहेको जानकारी दिइन् ।

उनका अनुसार हुलाक सेवालाई थप प्रभावकारी बनाउन डाँक शुल्क, पार्सल बिमा र क्षतिपूर्तिलगायत विषय समेटेर कानुन निर्माणको काम भइरहेको छ । सीमित स्रोतसाधनका बीच पनि हुलाक सेवालाई सरकारी कुरियर सेवाका रूपमा विस्तार गर्ने तयारी भइरहेको उनले बताइन् ।

जिल्ला हुलाक कार्यालय गोरखाका हुलाक अधिकृत विनोदप्रसाद गैरेले राहदानीबाहेक राष्ट्रिय परिचयपत्र, सवारी चालक अनुमतिपत्र, बैंक कार्ड तथा विभिन्न सरकारी प्रमाणपत्रसमेत हुलाकमार्फत वितरण गर्ने व्यवस्था गर्नुपर्ने बताए ।

गोष्ठीका सहभागीहरूले सडक तथा प्रविधिको विकाससँगै डाँक नक्सा सेवासमेत समयानुकूल परिमार्जन गरी सहज र सरल बनाउनुपर्नेमा जोड दिएका थिए।

Originally published on abcnews.com.np.