काठमाडौं । नक्कली शैक्षिक प्रमाणपत्र पेस गरी सरकारी सेवामा नियुक्ति लिएको आरोपमा डडेल्धुराकी एक बालविकास सहजकर्ताविरुद्ध भ्रष्टाचार मुद्दा दायर भएको छ।

डडेल्धुराको आलिताल गाउँपालिका–५ स्थित भगवती प्राथमिक विद्यालय, पर्सेरावलमा कार्यरत बालविकास सहजकर्ता मन्जु देवी बोहराविरुद्धअख्तियार दुरुपयोग अनुसन्धान आयोगले विशेष अदालत, काठमाडौंमा आरोपपत्र दायर गरेको हो।

आयोगका अनुसार बोहराले भारतको उत्तर प्रदेशस्थित माध्यमिक शिक्षा परिषद्बाट सन् २०१० मा हाइस्कुल परीक्षा उत्तीर्ण गरेको भन्दै नक्कली मार्कसिट, प्रमाणपत्र तथा प्रव्रजन (माइग्रेसन) प्रमाणपत्र तयार गरी विद्यालयमा पेस गरेकी थिइन्।

ती प्रमाणपत्रका आधारमा उनले बालविकास सहजकर्ता पदमा नियुक्ति लिएर बहाल रहँदै पारिश्रमिक, भत्ता तथा अन्य सुविधा लिएको अख्तियारको आरोप छ।

अख्तियारले अनुसन्धानबाट पेस गरिएका शैक्षिक प्रमाणपत्र नक्कली भएको दाबी गर्दै बोहराको कार्य भ्रष्टाचार निवारण ऐन, २०५९ को दफा १६ को उपदफा (१) बमोजिमको कसुर भएको जनाएको छ।

आयोगले सोही कानुनी व्यवस्थाअनुसार कैद र जरिवानाको सजाय मागदाबी गर्दै बोहराविरुद्ध विशेष अदालत, काठमाडौंमा भ्रष्टाचार मुद्दा दायर गरेकोजनाएको छ।

Originally published on abcnews.com.np.