काठमाडौं । रसुवाको भोटेकोशी खोलामा आएको बाढीपछि निर्माणाधीन माथिल्लो त्रिशूली–१ जलविद्युत् आयोजनाको कर्मचारी क्याम्पमा रहेका ३१ जना नेपाली सेनाको सम्पर्कमा आएका छन् ।

ऊर्जा, जलस्रोत तथा सिँचाइ मन्त्रालय स्रोतका अनुसार सम्पर्कमा आएका ३१ जनामध्ये सात जनाको उद्धार भइसकेको छ । बाँकीको उद्धार कार्य जारी रहेको छ ।

उद्धारका लागि नेपाली सेनाको हेलिकोप्टर घटनास्थलतर्फ पठाइएको मन्त्रालय स्रोतले जनाएको छ । यसअघि आयोजनामा कार्यरत ७६ जना कर्मचारी सम्पर्कविहीन भएको उनीहरूका आफन्तले बताएका थिए ।

‘हामीलाई जानकारी प्राप्त भएको छ कि ३१ जना कर्मचारी क्याम्पमै हुनुहुन्छ,’ मन्त्रालय स्रोतले भन्यो, ‘उनीहरूको उद्धार भइरहेको छ ।’

सम्पर्कमा आएका तथा उद्धार गरिएका व्यक्तिहरू आयोजनाका कर्मचारी मात्रै हुन् वा स्थानीयवासी पनि छन् भन्नेबारे भने यकिन विवरण प्राप्त भइसकेको छैन । उद्धारपछि मात्रै यसबारे स्पष्ट जानकारी आउने मन्त्रालय स्रोतले जनाएको छ ।

२१६ मेगावाटको आयोजना

माथिल्लो त्रिशूली–१ रसुवामा निर्माणाधीन २१६ मेगावाट क्षमताको जलविद्युत् आयोजना हो । बाढीपछि आयोजनाको कर्मचारी क्याम्पबाट सम्पर्कविहीन भएका व्यक्तिहरूको खोजी तथा उद्धार कार्य जारी रहेको छ । थप बेपत्ता व्यक्तिको अवस्थाबारे विस्तृत विवरण भने आउन बाँकी छ ।

Originally published on abcnews.com.np.