काठमाडौं, २७ असार । भारतको राजधानी नयाँ दिल्लीको एक स्कुलले शुल्क नतिरेको भन्दै ५० छात्रालाई स्कुलमै बन्धक बनाएको छ । अभिभावकले नानीहरुको शुल्क समयमै नतिरेका कारण सजायस्वरुप उनीहरुलाई स्कुलले बन्धक बनाएको समाचार भारतीय मिडियाहरुले सार्वजनिक गरेका छन् ।

दिउँसो अभिभावकहरू बच्चीलाई लिन स्कूल पुग्दा यसको बारेमा थाहा पाए । बच्चीहरू गर्मीका कारण भोकप्यासले बेहाल थिए ।

आफ्ना बच्चीहरूलाई यस्तो हालतमा देख्दा अभिभावक धेरै रिसाए । स्कूलबाहिर धेरै हल्लाखल्ला भयो । यो सूचना पाउनेबित्तिकै वरिष्ठ प्रहरी अधिकारीहरू स्कूल पुगे । अभिभावकको उजुरीपछि प्रहरीले बच्चीहरूलाई जबर्जस्ती बन्धक बनाइएकोमा मुद्दा दर्ता गरेको छ ।
राबिया गर्ल्स पब्लिक स्कूलमा यो घटना भएको हो । त्यहाँ १२ कक्षासम्म पढाइ हुन्छ ।

सोमवार बिहान स्कूल खुल्दा नर्सरी र केजी कक्षका छात्राहरूका मातापिता आफ्ना बच्चीलाई छोडेर गए । दिउँसो १२ः३० मा बच्ची लिन जाँदा ५९ चाहिँ क्लासमा थिएनन् ।

कर्मचारीहरूसँग सोध्दा फीस नदिएको कारण स्कूलकी हेडमास्टर फराह दीबा खानले आदेश दिएर बच्चीहरूलाई स्कूलको बेसमेन्टमा राखिएको बताए ।

साँघुरो कोठमा पंखा पनि नभएको अभिभावकहरूले बताए । चार र पाँच वर्षका बच्चीहरू भोक र प्यासबाट पीडित थिए ।

रिसाएका अभिभावकले हेडमास्टरसँग कुरा गर्दा उनले दुर्व्यवहार गर्दै बाहिर जान लगाइन् । स्कूल प्रशासनले चाहिँ बच्चीहरूलाई एक्टिभिटी रूममा राखिएको र बच्चीहरूलाई त्यहाँ केही बेर बस्न भनेको बतायो । यसबाहेक स्कूलले टिप्पणी गर्न मानेको छैन र सबै कुरा प्रहरीलाई बताउने भनेको छ ।