काठमाडौं, २१ भदौं । रुसमा आउँदो वर्ष हुने विश्वकप फुटबलको छनौट अन्तर्गत बुधबार बिहान भएको खेलमा उरुग्वेले महत्वपूर्ण जित दर्ता गरेको छ । दक्षिण अमेरिकी क्षेत्रको छनौट अन्तर्गतको खेलमा रुस विश्वकपका लागि छनौटका लागि महत्वपूर्ण खेलमा लुइस स्वारेजको टिम उरुग्वेले पाराग्वेलाई २–१ ले हराएको हो । पहिलो हाफमा गोलरहित बराबरी भएको खेलमा तीनै गोल दोस्रो हाफमा भयो । यहि खेलबाट राष्ट्रिय टिममा डेब्यु गरेका फेडेरिको भाल्भेर्डेले ७६ औं मिनेटमा गोल गर्दै उरुग्वेलाई अग्रता दिलाए । तर उरुग्वेको जितमा उपहार गोल महत्वपूर्ण रह्यो ।

८० औं मिनेटमा पाराग्वेका गुस्ताभो गोमेजले आत्मघाती गोल गरेपछि उरुग्वेले २–० को अग्रता लियो । ८८ औं मिनेटमा एन्जल रोमेरोले पाराग्वेका लागि एक गोल फर्काए । जितपछि उरुग्वे २७ अंकसहित दोस्रो स्थानमा उक्लिएको छ । दक्षिण अमेरिकी क्षेत्रका १० देश सहभागी प्रतिस्पर्धामा शीर्ष चार स्थानमा रहने टिम विश्वकपका लागि छनौट हुनेछन् । ब्राजिल यसअघि नै छनौट भएको छ । पाँचौं स्थानमा रहने टिमले प्लेअफ खेल्नु पर्ने छ ।
जितपछि उरुग्वे २७ अंक जोड्दै कोलम्बियालाई पछि पारेर दोस्रो स्थानमा उक्लिएको हो । तेस्रो स्थानको कोलम्बियाको २६, चौथो र पाँचौं स्थानका पेरु र अर्जेन्टिनाको समान २४ तथा छैटौं स्थानको चिलीको २३ अंक छ ।