पोखरा । गण्डकी प्रदेश सरकारबाट नेकपा एमालेले दिएको राजीनामाको निर्णय तत्कालका लागि रोकिएको छ । मन्त्री गोविन्द नेपालीले राजीनामा दिने हल्ला मात्रै भएको बताएका छन् ।

प्रमुख सचेतक देवका पहारीले मंगलबार बिहान संसदीय बोर्डको बैठकमा राजीनामाको निर्णय भएको जानकारी दिएकी थिइन् । तर, सोही दिन दिउँसो एमालेका चारै मन्त्रीहरू मन्त्रिपरिषद्को बैठकमा सहभागी भएका थिए, जहाँ सबैले राजीनामा दिने अपेक्षा गरिएको थियो ।

बैठक सकिएपछि भने मन्त्रीहरूले राजीनामा दिएनन् । बैठकबाट बाहिरिने क्रममा मन्त्री नेपालीले पत्रकारहरूसँग प्रतिक्रिया दिँदै ‘बाहिर आएको कुरा सत्य होइन, अहिलेसम्म हामी सरकारमै सामेल छौं’ बताए ।

संसदीय बोर्डमा निर्णय, तर कार्यान्वयन भएन

एमालेका एक सांसदका अनुसार संसदीय बोर्डको बैठकमा राजीनामा दिने गरी हस्ताक्षर भइसकेको थियो । ‘राजीनामा दिने निर्णय भएको हो, र राजीनामा पत्रमा चारै जनाको हस्ताक्षर पनि गरिएको छ,’ ती सांसदले बताए, ‘तर किन दिनुभएन भनेर थाहा छैन ।’

अर्का एक सांसदले जानकारी दिए अनुसार बुधबार एमाले संसदीय दलको बैठक राखिएको छ । सो बैठकमा राजीनामाबारे थप छलफल गरिनेछ, र विधिसम्मत रूपमा संसदीय दलले निर्णय गरेपछि मात्रै मन्त्रीहरूले राजीनामा दिने छन् ।

Originally published on abcnews.com.np.