बागलुङ/बरेङ गाउँपालिका स्वास्थ्य शाखाको वार्षिक समक्षिा बुधबार सम्पन्न भएको छ । समिक्षामा स्वास्थ्य चौकीहरु, स्वास्थ इकाई तथा स्वास्थ्य शाखातर्फको कार्यप्रगती, चालु वर्षका वार्षिक कार्ययोजनाबारे स्वास्थ चौकी प्रमुखहरुले प्रतिवेदन प्रस्तुत गरेका थिए ।

प्रतिवेदनमा उल्लेख भएअनुसार स्वास्थ्य तर्फको समस्या र चुनौतीको विषयमा पनि छलफल भई सुझाव संकलन गरिएको छ ।

कार्यक्रममा गाउँपालिकाले उपकरण खरिद गरेपनि दक्ष स्वास्थकर्मी नहुँदा प्रयोगविहिन भएको, हुग्दिशिर स्वास्थ चौकीको कर्मचारी आवास, कर्मचारी भान्साकोठामा पानी चुहिने समस्या रहेको, झ्यालका सिसा फुटेको, चौकीको नवनिर्मित भवनमा पनि पानी चुहिने र अपाङ्गमैत्री शौचालय उपलव्ध नभएको विषय उठेका थिए ।

प्राप्त सुझावलाई कार्यान्वयन गर्दै लैजाने र आगामी दिनमा छुटेका कामलाई सुधार गर्ने, स्वास्थ सम्बन्धी सचेतनाको लागि नागरिकसंगको भेटघाट, छलफल कार्यक्रमलाई निरन्तरता दिने सो अवसरमा गाउँपालिका अध्यक्ष कृष्ण प्रसाद शर्माले बताए ।

प्रमुख प्रशासकिय अधिकृत बद्रीनाथ पोखरेलले गत वर्षको समिक्षामा भएका सल्लाह सुझावलाई चालु वर्षमा कार्ययोजना बनाई पालिका स्वास्थ सुधारमा लाग्ने बताए ।

कार्यक्रममा मान्छेमा लाग्ने रोगहरु पानीबाट धेरै हुने भएकोले खानेपानीको मुहान सरसफाईमा ध्यान दिनुपर्ने, बर्खाको समयमा भेलबाढी मुहानमा पस्ने हुँदा पानी पिउन उपयुक्त छ कि छैन भन्ने जानकारीको लागि प्रयोगशाला जाँच गर्न उपकरण खरिद गरी पालिकामा व्यवस्थापन गर्न प्रदेश जनस्वास्थ कार्यालय बागलुङका प्रयोगशाला प्राविधिक डिल्ली प्रसाद आचार्यले सझाव दिएका छन् ।

प्रदेश जनस्वास्थ कार्यालयका अधिकृत टिकाराम भण्डारीले गाउँपालिकाको माग अनुसार स्वास्थ्यतर्फ सहयोग र नागरिक स्वास्थ सेवाको लागि आफुहरु सधैं तत्पर रहेको बताए ।

फेयरमेड फाउण्डेसन तथा सम्बोधन परियोजनाले पनि गाउँपालिकाको स्वास्थ्य क्षेत्रमा सहयोग गरिरहेको र चालु वर्ष पनि कार्ययोजना बनाई नागरिकको स्वास्थ्य तर्फको सेवालाई सहयोग गर्ने सम्बोधन परियोजनाका विष्णु पौडेलले जानकारी दिए ।

कार्यक्रम गाउँपालिका अध्यक्ष कृष्ण प्रसाद शर्माको अध्यक्षता, स्वास्थ शाखा प्रमुख तथा जनस्वास्थ निरिक्षक पदम बहादुर पुनको सञ्चालनमा सम्पन्न भएको थियो ।

Originally published on abcnews.com.np.