जनकपुरधाम । मुक्त घोषणा भएको वर्षौं बितिसक्दा पनि भूमि, आवास, सामाजिक सुरक्षा तथा सम्मानजनक जीवनको अधिकार सुनिश्चित नभएको भन्दै मुक्त हरवा–चरवाहरूले मधेस प्रदेशको राजधानी जनकपुरधाममा दबाबमूलक प्रदर्शन गरेका छन्।

नवगठित मुक्त हरवा–चरवा संघर्ष समितिको आयोजनामा मंगलबार गरिएको प्रदर्शनमा मधेस प्रदेशका आठवटै जिल्लाबाट आएका मुक्त हरवा–चरवा, अधिकारकर्मी तथा सामाजिक अभियन्ताहरूको उल्लेख्य सहभागिता रहेको थियो।

रेलवे स्टेशनबाट सुरु भएको विरोध र्याली जनकपुरधामका विभिन्न मुख्य सडक हुँदै मुख्यमन्त्री तथा मन्त्रिपरिषद्को कार्यालय पुगेको थियो। प्रदर्शनकारीहरूले मुख्यमन्त्री कार्यालयको मूल प्रवेशद्वार अगाडि धर्ना दिँदै आफ्ना माग तत्काल सम्बोधन गर्न प्रदेश सरकारसँग आग्रह गरेका छन्।

‘मुक्तिको घोषणा भयो, जीवनमा परिवर्तन आएन’

प्रदर्शनका क्रममा संघर्ष समितिका सदस्य लागेन्द्र सदाले सरकारले हरवा–चरवा प्रथा अन्त्य गरी मुक्त घोषणा गरे पनि व्यवहारमा उनीहरूको जीवनस्तरमा अपेक्षित परिवर्तन नआएको गुनासो गरे।

समितिका प्रतिनिधिहरूले मुक्त हरवा–चरवामध्ये धेरै अझै पनि भूमि, सुरक्षित आवास, रोजगारी र सामाजिक सुरक्षाजस्ता आधारभूत अधिकारबाट वञ्चित रहेको बताएका छन्। सरकारले घोषणा गरेअनुसार पुनःस्थापना तथा लक्षित कार्यक्रम प्रभावकारी रूपमा कार्यान्वयन हुन नसक्दा मुक्त समुदाय थप समस्यामा परेको उनीहरूको भनाइ छ।

प्रदर्शनकारीहरूले मुक्त हरवा–चरवाको पहिचान, अधिकार र उचित पुनःस्थापनासम्बन्धी कार्यक्रमलाई प्राथमिकताका साथ अघि बढाउन प्रदेश सरकारसँग माग गरेका छन्।

आन्दोलन थप सशक्त बनाउने चेतावनी

मुक्त हरवा–चरवा संघर्ष समितिले आफ्ना माग सुनुवाइ नभए आन्दोलनलाई थप सशक्त बनाउने चेतावनी दिएको छ।

समितिले दोस्रो चरणको आन्दोलनअन्तर्गत भदौ १० गते बुधबार पनि मुख्यमन्त्री तथा मन्त्रिपरिषद्को कार्यालय अगाडि धर्ना दिने जनाएको छ। सोही दिन प्रदेश सरकारलाई औपचारिक रूपमा मागपत्र बुझाउँदै समस्या समाधानका लागि तत्काल पहल गर्न दबाब दिइने संघर्ष समितिले जनाएको छ।

मुक्त घोषणा भए पनि व्यवहारमा पुनःस्थापना र अधिकार सुनिश्चित हुन नसकेको भन्दै संघर्ष समितिले सरकारको ध्यान अब घोषणाभन्दा कार्यान्वयनतर्फ केन्द्रित हुनुपर्नेमा जोड दिएको छ।

Originally published on abcnews.com.np.